Выбухі ў Бостане: трое загінулых, больш за сто параненых

(абноўлена - 10:48) Каля фінішнай рысы Бостанскага марафону прагрымелі два магутныя выбухі.

Паліцыя Бостана паведаміла, што ў выніку выбухаў загінулі тры чалавекі. Паводле паведамлення амерыканскіх СМІ, раненні атрымалі 134 чалавекі, 17 з іх знаходзяцца ў крытычным стане, перадае BBC.

Адзін з загінулых - васьмігадовае дзіця, паведамляюць амерыканскія СМІ. Паліцыя пакуль афіцыйна не пацвярджае асобы загінулых і дакладную колькасць пацярпелых у выбухах.

Паводле інфармацыі паліцыянтаў, выбухі былі здзейсненыя з дапамогай двух «магутных прылад».

Да гэтага часу ніхто не ўзяў на сябе адказнасць за тое, што адбылося. Ніякіх затрыманняў па гэтай справе таксама не праводзілася, паведамілі ў паліцыі.

Губернатар штата Масачусэтс Дэвал Патрык заклікаў людзей не набліжацца да раёна, дзе адбыліся выбухі. «Мы просім грамадзян спакойна вярнуцца дадому, а турыстаў - не пакідаць свае гасцініцы», - сказаў ён.

Паводле яго слоў, на дадзены момант няма ніякай вартай даверу інфармацыі, што жыхарам горада нешта пагражае. У той жа час улады просяць з разуменнем паставіцца да магчымых праверак, дагляду рэчаў і аб'ектаў.

Паліцыя Бостана сцвярджае, што ніякіх іншых выбуховых прылад не знойдзена. Раней агенцтва Асашыэйтэд прэс паведамляла са спасылкай на ананімную крыніцу ў сілавых структурах аб выяўленні яшчэ двух выбуховых прылад, якія не разарваліся. Пра гэта ж паведамляе і тэлекампанія Сі-эн-эн: паводле яе дадзеных, адзін зарад знойдзены ў гатэлі побач з месцам выбухаў, месцазнаходжанне другога не ўдакладняецца.

Адначасова ў твітары газеты Wall Street Journal з'явілася паведамленне, што спецыялісты нібыта выявілі ў Бостане пяць дадатковых выбуховых прылад, якія не сдэтанавалі.

На прэс-канферэнцыі, якая прайшла ў Бостане, камісар паліцыі Эд Дэвіс заявіў, што іншых выбуховых прылад не знойдзена, аднак у цяперашні час вывучаюцца паведамленні аб падазроных знаходках, што, па яго словах, вытлумачальна ў такой сітуацыі.

Расследаванне Узначаліў ФБР, чые прадстаўнікі апісваюць гэтую справу як «патэнцыйна тэрарыстычнае расследаванне».

Карэспандэнты паведамляюць, што многія пацярпелыя ў выбухах пазбавіліся канечнасцяў. Паводле інфармацыі Сі-эн-эн, дактары кажуць, што вымаюць з целаў параненых металічныя шарыкі.

Прэзідэнт ЗША Барак Абама ў экстраным звароце да нацыі заявіў, што ўлады ЗША пакуль не ведаюць, хто стаіць за гэтымі выбухамі, але паабяцаў, што расследаванне будзе самым дбайным.

«Мы пакуль не ведаем, хто зрабіў гэта ці чаму, і людзям не варта рабіць паспешныя высновы, пакуль у нас няма ўсіх фактаў. Але не памыляйцеся, мы дакапаемся да сутнасці таго, што адбылося», - сказаў Абама.

У сваім тэлезвароце Абама не выкарыстоўваў слова «тэрарызм». Магчыма, ён зрабіў гэта з асцярожнасці. У той жа час Абама безумоўна ўсведамляе, што яго будуць крытыкаваць за невыкарыстанне гэтага слова, так што па ўсёй бачнасці гэта было зроблена наўмысна, паказвае Мардэл.

Па словах Абамы, спецслужбы будуць узмацняць меры бяспекі ў розных рэгіёнах ЗША «па меры неабходнасці». Раней на ўзмоцнены рэжым службы былі пераведзеныя дэпартаменты паліцыі Нью-Йорка і Вашынгтона.

Паветраная прастора над Бостанам абвешчана зонай, закрытай для палётаў.

Грукат, падобны на гром

Фотаздымкі і відэазапісы, якія паступаюць з месца здарэння, сведчаць пра хаос; скрываўленых гледачоў вядуць у медыцынскія намёты, вуліца запоўненая паліцыяй і машынамі хуткай дапамогі.

«Пацярпела мноства людзей», - паведаміў рэпарцёрам адзін з удзельнікаў марафону.

Выбухі адбыліся каля 15:00 па мясцовым часе, прыкладна праз дзве гадзіны пасля таго, як фінішавалі пераможцы, але да таго, як усе 27 тысяч бегуноў дабраліся да фінішнай рысы. Па словах відавочцаў, некаторыя пацярпелыя атрымалі сур'ёзныя раненні і калецтвы.

Пазней паліцыя паведаміла пра трэці выбух - у бостанскай Бібліятэцы імя Кэнэдзі. Пакуль не ясна, ці звязаныя паміж сабой гэтыя выбухі.

Па словах супрацоўнікаў бібліятэкі, у будынку ўзнік пажар, але ніхто не пацярпеў.

Канадзец Майк Мітчэл , які ўдзельнічаў у марафоне, распавёў, што глядзеў у бок фінішнай лініі і бачыў моцны выбліск, пасля чаго на гэтым месцы сталі падымацца клубы чорнага дыму, а сярод людзей пачалася паніка.

Яшчэ адзін сведка напісаў пра ўбачанае ў электронным лісце: «Я быў каля самай фінішнай рысы, побач з крамай. Я гуляў з тэлефонам, як раптам пачуўся моцны грукат, падобны на гром. Вітрына крамы разляцелася на дробныя аскепкі, адзін з якіх трапіў мне ў шчаку . Я быў у Афганістане. Было падобна, быццам спрацавала самаробнае выбуховае прыстасаванне».

Бегуны, які заканчвалі марафон, былі перанакіраваныя на іншыя вуліцы, а месца выбухаў, над якім падняліся клубы дыму, ачэплена.

Мясцовае аддзяленне Чырвонага Крыжа адкрыла пункт хуткага рэагавання на месцы здарэння.

Штогадовы Бостанскі марафон - адна з самых буйных спартыўных падзей такога роду ў Злучаных Штатах, ён прыцягвае дзесяткі тысяч гледачоў.

У марафоне гэтага года ўдзельнічалі 2 беларускі. Яны не пацярпелі.

Паліцыя Нью-Йорка паведамляе пра размяшчэнне антытэрарыстычных падраздзяленняў каля ключавых будынкаў. Павышаныя меры бяспекі прымаюцца і ў Вашынгтоне.

Як стала вядома, у Бостанскім марафоне ўдзельнічала і грамадзянка Беларусі - 33-гадовая Алена Макоўская. Яна выступала ва ўзроставай групе 18-39 гадоў і паказала 741-ы вынік. Яшчэ адна беларуская грамадзянка, 32-гадовая Жанна Івашчанка, заявілася, але на старт не выйшла.