Андрэй Саннікаў: Гэта ініцыятыва прыхільнікаў «легітымнай дыктатуры»

Лабістам Лукашэнкі тэрмінова спатрэбілася гучная ініцыятыва, якая імітуе апазіцыйную дзейнасць і бяспечная для рэжыму.

Так лідар грамадзянскай кампаніі «Еўрапейская Беларусь» Андрэй Саннікаў пракаментаваў «Радыё Свабода» чарговую ініцыятыву руху «За свабоду», грамадзянскай кампаніі «Гавары праўду» і Партыі БНФ, якая была агучаная ўчора ў Менску.

«На жаль, «тройка» пацвярджае сваю рэпутацыю прыхільнікаў «легітымнай дыктатуры». І зноў гучныя заявы з'яўляюцца напярэдадні нейкіх падзей у Еўропе. На гэты раз у канцы месяца будзе правядзенне «Еўранэста». Еўрапарламент нарэшце зрабіў сур'ёзны крок: вырашыў перастаць угаворваць лукашэнкаўскі рэжым пагадзіцца на прысутнасць апазіцыі ў «Еўранэсце» і правесці пасяджэнне без «палаткі», але з прадстаўнікамі беларускай апазіцыі. На фоне заляцання Еўропы з рэжымам Лукашэнкі гэта рашэнне выглядае крокам у правільным кірунку і аслабляе пазіцыі еўрапейскіх лабістаў дыктатара.

Гэтым лабістам тэрмінова спатрэбілася гучная ініцыятыва, якая імітуе апазіцыйную дзейнасць і бяспечная для рэжыму, каб на «Еўранэсце» адвесці ў бок прынцыповую размову пра дыктатуру ў Беларусі. Тут і спатрэбілася «тройка». Такога, сапраўды, у беларускай палітыцы яшчэ не было: народны рэферэндум без фармулявання пытанняў. Да такога нават Лукашэнка не дадумаўся. А бо некаторыя ўдзельнікі «тройкі» раней заяўлялі пра кампанію «новыя выбары без Лукашэнкі».

Варта звярнуць увагу на галоўны, на мой погляд, элемент ініцыятывы: стратэгічнае партнёрства «тройкі» на мясцовыя, прэзідэнцкія і парламенцкія «выбары». Партнёры тым самым даюць зразумець, што выбары ў Беларусі на самой справе існуюць і што яны не збіраюцца змагацца за ўладу, паколькі захаванне партнёрства пасля «прэзідэнцкіх выбараў» азначае, што ніякіх змен у Беларусі яны не чакаюць і працаваць на іх не маюць намеру.

Думаю, мы яшчэ не раз пачуем пра падобныя гучныя ініцыятывы, якія закліканыя адцягнуць увагу і беларусаў, і ЕЗ ад апошняй дыктатуры ў Еўропе і ад лёсу палітвязняў»», - заявіў Андрэй Саннікаў.

Нагадаем, учора рух «За свабоду», Партыя БНФ і грамадзянская кампанія «Гавары праўду» абвясцілі пра пачатак кампаніі «Народны рэферэндум». На прэс-канферэнцыі тры арганізацыі заявілі пра доўгатэрміновае стратэгічнае партнёрства. Па словах аднаго з удзельнікаў, Уладзіміра Някляева, супрацоўніцтва разлічана, па меншай меры, на тры бліжэйшыя выбарчыя кампаніі - мясцовыя, прэзідэнцкія і парламенцкія «выбары».