Тавараабарот з краінамі ЕЗ знізіўся на 26%
7- 21.05.2013, 11:03
Тавараабарот з краінамі Еўрапейскага звяза ў студзені-сакавіку 2013 года знізіўся на 26% і склаў 5 млрд. 627,9 млн. даляраў.
У мінулым годзе за гэты перыяд тавараабарот вырас на 60,2%, перадае БелаПАН.
За першы квартал бягучага года экспарт зменшыўся на 42,2% (3 млрд. 355,1 млн. даляраў), імпарт вырас на 26,1% (2 млрд. 272,8 тыс. даляраў). Дадатнае сальда склала 1 млрд. 82,3 млн. даляраў.
Асноўнымі гандлёвымі партнёрамі Беларусі з'яўляліся: Расея - 48,4% ад усяго аб'ёму тавараабароту, Нідэрланды - 8,6%, Украіна - 7,5%, Германія - 6%, Кітай - 4,3%, Польшча - 2,6%, Італія - 2,5%, Злучанае Каралеўства - 1,5%, Літва - 1,4%, Латвія - 0,9%.
Экспарт тавараў у Расею склаў 3 млрд. 841,5 млн. даляраў ЗША, што на 4,4% больш, чым за студзень-сакавік 2012 года; імпарт з Расеі - 5 млрд. 735,4 млн. (на 23,6% менш).
Аб'ём экспарту ва Украіну дасягнуў 971,8 млн. даляраў (на 13,8% менш), імпарту ў Беларусь - 503,3 млн. (на 23,9% больш).
У Нідэрланды экспартавана тавараў на 1 млрд. 604,6 млн. даляраў (на 45,6% менш за паказчык студзеня-сакавіка 2012 года), імпартавана - на 91,8 млн. (на 0,5% больш).
Экспарт у Германію склаў 441,3 млн. (на 2,8% менш), імпарт - 738,6 млн. (на 58,2% больш).
У Кітай экспартавана тавараў на 238,4 млн. (у 2,8 раза больш), імпартавана - на 613,5 млн. (на 38,3% больш).
Экспарт у Польшчу склаў 197,9 млн. (на 24,6% менш), імпарт - 320 млн. (на 15,4% больш).
Экспарт у Італію дасягнуў узроўню 285,6 млн. (на 34,8% больш), імпарт - 207,1 млн. (на 1,1% больш).
У Злучанае Каралеўства экспартавана тавараў на 22,3 млн. (у 3,1 раза больш), імпартавана - на 79,9 млн. (на 10,4% больш).
У Літву аб'ём экспарту знізіўся да 196,5 млн. даляраў (на 27,4% менш), імпарт павялічыўся да 86,3 млн. (на 33,3% больш).
Рэзка знізіўся экспарт у Латвію - на 87,4% да 146,5 млн. даляраў, імпарт вырас на 26,3% і склаў 35,7 млн. даляраў. У Латвію паступаюць з Беларусі нафтапрадукты, растваральнікі, мінеральныя ўгнаенні, трактары і цягачы, некаторыя сталёвыя вырабы, медныя сплавы, лесаматэрыялы, грузавыя чыгуначныя вагоны, сельгаспрадукцыя.
