У Грузіі затрымалі экс-прэм'ера Мерабішвілі

У Грузіі затрыманы былы кіраўнік урада, адзін з лідараў прапрэзідэнцкай партыі «Адзіны нацыянальны рух» Вано Мерабішвілі.

Экс-прэм'ера ўзялі пад варту пасля допыту ў пракуратуры. Яго падазраюць у карупцыйных злачынствах, піша Lenta.ru.

У прыватнасці, Вано Мерабішвілі (на фота) абвінавачваюць у фіктыўным працаўладкаванні актывістаў «Адзінага нацыянальнага руху» (у 2012 годзе, калі гэтая партыя яшчэ знаходзілася ва ўладзе). Паводле інфармацыі следства, гэтыя людзі павінны былі весці ўлік беспрацоўных, але замест гэтага займаліся перадвыбарнай агітацыяй за партыю ўлады. Пры гэтым яны атрымлівалі зарплату з бюджэту, у агульнай колькасці з бюджэту ім, як сцвярджаецца, было выплачана 5,2 мільёна лары (каля трох мільёнаў даляраў).

Акрамя таго, былога прэм'ера падазраюць у прысваенні лецішча, якое знаходзіцца ў вёсцы Кварыаці.

Разам з Мерабішвілі затрыманы таксама былы міністр працы Зураб Чыаберашвілі (яго падазраюць у дачыненні да згаданага фіктыўнага працаўладкавання актывістаў). Мера стрымання ім пакуль не прызначаная.

Вано Мерабішвілі доўгі час узначальваў МУС Грузіі (пост міністра ўнутраных спраў ён заняў пасля «рэвалюцыі ружаў»). Ён лічыўся адным з блізкіх паплечнікаў прэзідэнта Міхаіла Саакашвілі. На пасаду прэм'ера Мерабішвілі быў прызначаны летам 2012 года, праўда, ужо неўзабаве ён вымушаны быў сысці ў адстаўку: восенню 2012 года, нагадаем, партыя Саакашвілі прайграла парламенцкія выбары і ў краіне быў сфармаваны новы ўрад на чале з лідарам апазіцыйнай кааліцыі «Грузінская мара» Бідзінай Іванішвілі.

Пасля фактычнай змены ўлады ў Грузіі пачаліся допыты і затрыманні чыноўнікаў, якія працавалі пры Саакашвілі. Былога прэм'ера, у прыватнасці, ужо некалькі разоў выклікалі на допыт. Акрамя іншага яго абвінавацілі ў спробе пакінуць краіну па чужым пашпарце. Сам Мерабішвілі назваў гэтыя абвінавачванні абсурднымі.