На канцэрце N.R.M. у «Гудвіне» забаранілі відэаздымку

Памочнік кіраўніка менскага клуба «Гудвін» адмовілася пракаментаваць забарону журналістам весці відэаздымку на канцэрце NRM, які адбудзецца ўвечары 23 траўня.

Інцыдэнт узнік пасля таго, як журналістам незалежнага тэлеканала «Белсат» адмовілі ў акрэдытацыі на мерапрыемства. Па словах арганізатара канцэрту прадзюсара Паўла Кашырына, прычынай адмовы тэлежурналістам у акрэдытацыі стала «рашэнне ўладальніка прыватнага клуба «Гудвін», які забараніў любую відэаздымку мерапрыемства, перадае БелаПАН.

Журналісты «Белсата» ў каментары прэс-службе БАЖ адзначылі: «Для праграмы «Агляд культурных мерапрыемстваў» нас акрэдытоўвывалі нават дзяржаўныя ўстановы. А тут, так бы мовіць, «свае» інтэлігентна паслалі, матывуючы адмову ў акрэдытацыі пагрозай страціць адзіную пляцоўку, дзе можна рабіць такога роду канцэрты. Ганьба! Пакуль музыкі і арганізатары канцэртаў будуць ствараць чорныя спісы з журналістаў, самі ж у падобныя сітуацыі будуць трапляць».

Дадзены інцыдэнт не першы: год назад журналістам «Белсата» ўжо было адмоўлена ў акрэдытацыі на канцэрт саліста гурта Neuro Dubel Аляксандра Кулінковіча ў тым жа клубе «Гудвін». Тады Павел Кашырын патлумачыў нежаданне бачыць здымачную групу тэлеканала закрытым фарматам мерапрыемства. Нагадаем, Кулінковіч нядаўна стаў калумністам «Советской Белоруссии».