«Укантакце» забаранілі па памылцы

Супрацоўнік Раскамнагляду не там паставіў галачку.

Пра гэта паведаміў прадстаўнік арганізацыі Уладзімір Пікаў, перадае BBC.

«Гэта памылка, выпадковасць. Наш супрацоўнік не там паставіў галачку, што прывяло да трапляння IP-адраса ў рэестр. Мы выдалім «Укантакце» з рэестра, і ён павінен быць даступны ўсім карыстальнікам», - сказаў Пікаў.

Як правіла, у рэестр Раскамнагляду трапляюць сайты, на якіх размешчаная дзіцячая парнаграфія, а таксама матэрыялы, якія прапагандуюць, на думку ведамства, самагубствы і наркотыкі.

Падобныя памылкі здараліся і раней: у рэестр, у прыватнасці, траплялі сацыяльная сетка «Аднакласнікі» і пошукавік Google. Раскамнагляд таксама называў гэтыя выпадкі тэхнічнымі памылкамі.

Паступаюць паведамленні, што ў некаторых рэгіёнах, у тым ліку ў Санкт-Пецярбургу і Забайкаллі, доступ да сеткі «Укантакце» быў адразу ж заблакаваны правайдэрамі.

Рэестр забароненых у Расеі сайтаў быў створаны ў лістападзе 2012 года. У яго ўносяцца рэсурсы, якія, на думку ўладаў, змяшчаюць дзіцячую парнаграфію, прапаганду наркотыкаў або суіцыду. Рашэнне аб забароне сайтаў прымаюць у Раскамнаглядзе, Расспажыўнаглядзе або Федэральнай службе па кантролі за абаротам наркотыкаў.

З моманту пачатку працы рэестра ў яго трапілі шэраг буйных рэсурсаў. У прыватнасці - энцыклапедыя «Луркамор'е» і відэахостынг YouTube. Пасля выдалення матэрыялаў, да зместу якіх узніклі прэтэнзіі, гэтыя сайты выключылі са спісу.

Расейская апазіцыя лічыць рэестр інструментам цэнзуры і заяўляе, што ўлады выкарыстоўваюць яго для падаўлення іншадумства ў сетцы.