«Беларуснафта» паскардзілася на высокія тарыфы

Кампанія вырашыла аднавіць уласную сістэму транспарціроўкі нафтапрадуктаў.

Таксама «Беларуснафта» плануе павялічыць долю выкарыстання аўтатранспарту, паведаміў агенцтву «Інтэрфакс» удзельнік паліўнага рынку Беларусі.

«Кампанія прыняла рашэнне аднавіць уласную трубаправодную сістэму для транспарціроўкі нафтапрадуктаў. Гэта з'яўляецца адным з асноўных напрамкаў для зніжэння лагістычных выдаткаў прадпрыемства і звязана з рэзкім ростам тарыфаў на чыгуначныя перавозкі, які адбыўся ў рамках уніфікацыі тарыфаў у АЭП», - паведаміў суразмоўца агенцтва.

Ён адзначыў, што завяршыць гэтую працу аб'яднанне плануе да канца 2015 года. У цяперашні час «Беларуснафта» ўжо пачала аднаўляць трубаправод, які злучае ААТ «Нафтан» і нафтабазу аб'яднання ў Фаніпалі (Менскі раён, Менская вобласць).

Акрамя таго, з мэтай зніжэння лагістычных выдаткаў «Беларуснафта» мае намер актыўна развіваць перавозкі паліва аўтамабільным транспартам, у тым ліку па экспартных кантрактах у Расею. З гэтай мэтай у аб'яднанні ўжо сфармаваны дастатковы парк спецтранспарту.

Удзельнік паліўнага рынку Беларусі таксама нагадаў, што ў канцы 2012 года ў Беларусі былі павышаныя тарыфы на чыгуначныя перавозкі грузаў унутры рэспублікі. Гэта было зроблена ў рамках узятых Беларуссю на сябе абавязацельстваў па ўніфікацыі тарыфаў на чыгуначныя перавозкі ў АЭП. Павышэнне адбылося ў 2 этапы і закранула цэлыя катэгорыі стратэгічных грузаў, у тым ліку нафтавых.

«У студзені 2013 года ў параўнанні са студзенем мінулага года тарыфы на перавозку нафтапрадуктаў па некаторых маршрутах выраслі амаль у 14 разоў», - падкрэсліў суразмоўца агенцтва.

Пазней, у пачатку вясны 2013 года, беларускія нафтаперапрацоўшчыкі звярнуліся ў Мінэканомікі з просьбай знізіць тарыфы, паколькі іх ужыванне вяло да сур'ёзных страт суб'ектаў гаспадарання. Тады беларускія НПЗ і ВА «Беларуснафта» атрымалі магчымасць карыстацца льготнымі тарыфнымі стаўкамі.

«Але і прымяненне гэтых ставак не змагло цалкам пакрыць страты. Акрамя таго, сітуацыя, якая склалася, сур'ёзна ракачала «крэдыт даверу» да ўмоў працы на беларускім рынку», - адзначыла крыніца.

Ён падкрэсліў, што «тэндэнцыя, калі валаўтваральныя прадпрыемствы імкнуцца па максімуму мець уласныя аб'екты энергетычнай і транспартнай інфраструктуры, характэрная для сённяшняй эканомікі Беларусі». «Яна сведчыць пра тое, што буйны бізнес, нават калі ён цалкам належыць дзяржаве, не хоча залежаць ад паслуг дзяржаўных манаполій, будзь то ў энергетыцы або ў транспартнай галіне», - сказала крыніца.

У сувязі з гэтым ён нагадаў пра імкненне многіх буйных прадпрыемстваў сістэмы «Белнафтахіма» ці міністэрства прамысловасці будаваць і эксплуатаваць уласныя энергагенерыруючыя крыніцы.

«Гэта імкненне натыкаецца на пэўнае супрацьдзеянне з боку профільных органаў дзяржкіравання, але ў канчатковым выніку рэалізаваць такія праекты прадпрыемствам часцей за ўсё ўдаецца», - сказаў эксперт.