Брытанскія ВПС перахапілі авіялайнер з Пакістана

(абноўлена) Брытанскі знішчальнік быў узняты ў паветра ў сувязі з інцыдэнтам з пакістанскім пасажырскім самалётам у паветранай прасторы Вялікабрытаніі.

Як паведаміла міністэрства абароны краіны, самалёт пакістанскіх авіяліній (Pakistani International Airlines - PIA), які накіроўваўся з Лахора ў Манчэстэр, быў перанакіраваны ў аэрапорт Стэнстэд. На борце знаходзілася больш за 300 чалавек. Паводле паведамленняў, усе пасажыры ўжо пакінулі самалёт, ніхто не пацярпеў, паведамляе BBC.

Паліцыя графства Эсэкс паведаміла толькі, што на борце самалёта адбыўся нейкі інцыдэнт. Два чалавекі былі зняты з борта. Самалёт знаходзіцца на выдаленай стаянцы аэрапорта.

Знішчальнік «Тайфун» суправаджаў пасажырскі самалёт да пасадкі ў аэрапорце Стэндстэд.

Самалёт, які выконваў рэйс PK709, вылецеў з Лахора а 9:30 паводле мясцовага часу. Ён павінен быў прыбыць у Манчэстэр а 14:00 паводле Грынвічы.

Як паведамілі прадстаўнікі PИA, у самалёце знаходзіліся 308 пасажыраў, а таксама 14 чальцоў экіпажа, уключаючы пілотаў. Усе пасажыры на борце самалёта былі грамадзянамі Пакістана і Вялікабрытаніі.

«Нам паведамілі, што магла быць пагроза бомбы», - прадстаўнік PИA Зульфікар Біджарыні сказаў тэлеканалу CNN.

Аэрапорт Стэнстэд паведаміў, што ў гэты момант працуе ў нармальным рэжыме.

Іншыя падрабязнасці пакуль не вядомыя.

Нагадаем, сёння раніцай у лонданскім аэрапорце Хітроў былі на час закрытыя абедзве ўзлётна-пасадачныя паласы пасля аварыйнай пасадкі самалёта авіякампаніі British Airways, які накіроўваўся ў Осла.