Аўто для чыноўнікаў закупілі на Br42 мільярда
21- 31.05.2013, 10:38
- 29,666
На такую суму пацягнуць усе аўтамабільныя тэндэры чыноўнікаў за пяць месяцаў 2013 года.
За ўвесь 2012 год службовыя машыны каштавалі ў 7 разоў менш.
Пасля ўказу Лукашэнкі аб ліміце на кошт аўтамабіляў службовыя машыны сталі купляць нават тыя, хто раней і не збіраўся рабіць гэтага.
«Еўрарадыё» заўважыла, што мясцовыя і рэспубліканскія бюджэты не толькі забяспечваюць дзяржслужачых добрымі аўтамабілямі коштам 25 тысяч еўра, але і выконваюць нестандартныя пажаданні кліентаў-чыноўнікаў.
Напрыклад, кіраўніку сельскагаспадарчага аддзела Уздзенскага райвыканкама купляюць Renault Duster толькі... карычневага колеру.
«Справа ў тым, што наш кіраўнік убачыў у чалавека менавіта такую машыну ў такім колеры. У чорным яна не так глядзіцца, а вось у карычневым!.. Гэта не каб маскіравацца дзесьці ў полі, гэта толькі справа густу», - тлумачаць ва Уздзенскім райвыканкаме. Кошт густу чыноўніка - 230 мільёнаў рублёў.
Нават у Міністэрства па падатках і зборах густы танней. Там набываюць адразу 25 аўтамабіляў - за куплю аддалі 3 мільярды рублёў.
«Аўтамабілі трэба ў раённыя і абласныя аддзяленні МПЗ. Паступова трэба мяняць машыны: дзе якая зламаецца, трэба замяніць», - кажуць у Міністэрстве па падатках і зборах, пакуль я дзіўлюся масавай крытычнай паломцы машын. Гэта ж трэба - адразу 25 штук!
У МПЗ кажуць, што купляюць толькі беларускія аўтамабілі і не першы год.
«Samand. Мы і год таму куплялі, і цяпер. Аўтамабіль як аўтамабіль. Ёсць нюансы: па дарогах правінцыі - ведаеце самі, якія дарогі. Усё ў адпаведнасці з заканадаўствам, ёсць указ, які рэгламентуе купляць аўтамабілі беларускай вытворчасці», - кажуць у МПЗ і дадаюць, што ўказ існаваў і да ўвядзення ліміту на кошт службовага аўто.
Белстат купляе адразу чатыры WV Passat Lim Trendline TSI Sedan. Кошт кожнага аўто - 25 тысяч еўра. Навошта?
«Для галоўных упраўленняў па абласцях. Яны чамусьці самі не змаглі аформіць заяўку, да нас звярнуліся», - нявесела кажа дзяўчына з Белстата. І я разумею яе смутак: калі супрацоўнікі Віцебска, Гомеля, Гродна не могуць самі аформіць заяўку на электронны аўкцыён, якая тады статыстыка...
Райвыканкам Бераставіцы купляе аўтамабіль для... ўчастковага:
«Ніву» з трыма дзвярыма або аналаг», - кажуць у Бераставіцы. Райвыканкам любіць свайго ўчастковага на 90 мільёнаў рублёў - менавіта столькі каштуе будучая машына.
Фінансаваму аддзелу Чэрвеньскага райвыканкама Менскай вобласці далі на аўто больш за 230 мільёнаў. А такому ж фінаддзелу Хоцімскага райвыканкама Магілёўскай вобласці - на 100 мільёнаў менш. Несправядліва!
«Мы ўжо і самі заўважылі такую розніцу, не любяць нас чамусьці. Але адзін раён нашай вобласці ўсё ж выдзелілі. Які? Шклоўскі - фінансаваму аддзелу далі 142 млн на аўтамабіль, - кажуць у Хоцімскім райвыканкаме. - Мы баімся, што калі не купім, так і гэта забяруць! Нам бы хоць што ўжо купіць».
2013 год - нейкі фатальны для службовых аўтамабіляў: ламаюцца і не адрамантаваць. На сайце дзяржзакупак тэндэраў на закупку аўтамабіляў каля тысячы: купляюць аўто і абл-, і сельвыканкамы. Дзе, скажыце, Дунілавіцкі, Ходцаўскі сельсаветы? А яны цягнуць з бюджэту па 88 мільёнаў рублёў кожны.
За пяць месяцаў 2013 года абвешчана тэндэраў на службовыя аўтамабілі на... 42 мільярды рублёў! За ўвесь 2012 год чыноўнікі замовілі службовых машын усяго на 6 мільярдаў. Гэта амаль у 7 разоў менш.