«Белавія» будзе штрафаваць за спазненні

Дрэнная навіна для тых, хто любіць прыязджаць у аэрапорт перад самым заканчэннем рэгістрацыі на рэйс.

Партал Interfax.by даведаўся, што пагражае пасажырам, якія спазняюцца.

Авіяперавозчыкі заўсёды рэкамендуюць прыязджаць у аэрапорт мінімум за 2 гадзіны да рэйса, каб пасажыр паспеў уладзіць усе фармальнасці - аформіць багаж, прайсці пашпартны, мытны кантроль, а таксама кантроль бяспекі. Звычайна рэгістрацыя завяршаецца за 40 хвілін да адпраўлення самалёта, але некаторыя авіякампаніі сканчаюць яе за 45 хвілін ці нават за 1 гадзіну. Гэтыя нюансы заўсёды трэба ўдакладняць у спецыялістаў пры браніраванні квітка.

Некаторыя кампаніі могуць аштрафаваць пасажыра, які спазніўся, і не дапусціць яго на рэйс. І калі 1-2 хвілінкі, пры ўмове, што вам трапіцца паблажлівы работнік мытнай службы, могуць і не стаць сур'ёзнай праблемай, то затрымаўшыся ледзь даўжэй, вы ўжо ні ў якім разе не зможаце паляцець. Справа ў тым, што час на праходжанне ўсіх фармальнасцяў пралічаны да хвіліны і павінен строга выконвацца, а рэйс з-за вас затрымліваць ніхто не збіраецца. Часам уважлівыя служачыя авіякампаніі, калі яны бачаць, што рэгістрацыя амаль скончаная, а хто-небудзь з пасажыраў яшчэ не прыбыў да патрэбнага сектару, аб'яўляюць па гучнай сувязі імя непунктуальнага вандроўцы і просяць яго паспяшацца. Аднак далёка не ўсе перавозчыкі праяўляюць такі клопат.

Дыяпазон памераў штрафу вельмі шырокі, і сума вызначаецца ў індывідуальным парадку з кожным пасажырам. «Калі чалавек не з'явіўся да заканчэння рэгістрацыі, мы глядзім, які ў яго набыты квіток, з якім тарыфам, і ў адпаведнасці з гэтым прызначаем памер штрафу», - распавялі Interfax.by у Нацыянальнай авіякампаніі «Белавія».

Што ж рабіць, калі вы па нейкіх прычынах спазняецеся на рэгістрацыю авіярэйса? У першую чаргу варта патэлефанаваць у сэрвісную службу вашай авіякампаніі і расказаць аб сітуацыі. Яны, на ўсялякі выпадак, папярэдзяць мытную службу, і, калі спатрэбіцца, могуць дапамагчы ў пошуку іншага рэйса ў тым жа кірунку. Вы таксама можаце паспрабаваць вярнуць грошы, але і тут усё залежыць ад перавозчыка: як правіла, грошы за квіткі эканом-класа або набытыя па спецыяльных тарыфах не вяртаюцца. У некаторых выпадках сутнасць штрафу як раз і складаецца ў тым, што пасажыр проста не зможа здаць назад свой квіток - гэта, зноў жа, залежыць ад тарыфу. Калі вам усё ж пагадзіліся заплаціць, то не факт, што кампанія не возьме адсотак за вяртанне.

У некаторых аэрапортах ёсць спецыяльныя стойкі для рэгістрацыі пасажыраў, якія спазняюцца, аднак у Нацыянальным аэрапорце «Менск» такой, на жаль, няма.

Спіс авіякампаній, якія могуць узяць штраф за спазненне на рэгістрацыю рэйса (у залежнасці ад тарыфу):

- «Белавія»

- Аэрафлот

- Austrian Airlines

- Es Al Israel Airlines

- Lufthansa Airlines

- S7 Airlines (пры любым тарыфе)

- Utair

Нагадаем, у мінулым годзе «Белавія» штрафавала турыстаў за адмову ад палёту ў зону баявых дзеянняў. Многія беларускія турысты адмовіліся ад набытых пуцёвак у Ізраіль у сувязі з баявымі дзеяннямі ў 2012 годзе. Тады «Белавія» спаганяла штраф за ануляцыю кожнага квітка, лічачы, што ў Ізраілі не ўсё так страшна.