Роберт Тышкевіч: Сорамна супрацоўнічаць з Лукашэнкам

«Грамадзянская платформа» асуджае стварэнне ў польскім Сейме групы лабістаў Лукашэнкі.

Яна раіць дэпутатам ад урадавай кааліцыі, якія ўвайшлі ў склад новай групы па супрацоўніцтве з Беларуссю ў Сейме Польшчы, пакінуць яе шэрагі. «Гэта сорам і сур'ёзная палітычная памылка», - так пракаментаваў яе стварэнне дэпутат «Грамадзянскай платформы» Роберт Тышкевіч. Ён з'яўляецца старшынёй існуючай з 2005 года групы па справах Беларусі.

Новае парламенцкае аб'яднанне, якое, па словах яго стваральнікаў, будзе займацца паглыбленнем эканамічнага і культурнага супрацоўніцтва, некалькі дзён таму ўзнікла ў польскім Сейме. Яго ініцыятарам стаў дэпутат «Звязу левых сіл» Яўген Чыквін, прадстаўнік беларускай меншасці ў Польшчы, перадае Polskie Radio.

Роберт Тышкевіч кажа, што «да гэтага часу польскі парламент па-за партыйнымі падзеламі прадстаўляў адну пазіцыю, якая асуджае рэжым Лукашэнкі». Ён не мае сумневаў, што новая ініцыятыва з'яўляецца контргрупай ў дачыненні да існуючай і накіраваная на стварэнне пралукашэнкаўскага лобі ў польскім Сейме. Па словах Роберта Тышкевіча, гэта выразна відаць ў яе назве, якое кажа не пра польска-беларускую дружбу або польска-беларускае супрацоўніцтва, а пра супрацоўніцтва з Рэспублікай Беларусь.

«Хто сёння кіруе беларускай дзяржавай? Гэта добра вядома, - заявіў Роберт Тышкевіч. - Гэта ініцыятыва, мэта якой - супрацоўніцтва з рэжымам у Менску, пабудова пазітыўнага вобразу гэтага рэжыму ў польскім Сейме і польскім палітычным жыцці. Калі б працы гэтай камісіі мелі якую-небудзь іншую мэту, то дэпутат Чыквін і іншыя ініцыятары маглі б прымаць удзел у іншай групе па справах Беларусі, якая даўно дзейнічае ў польскім Сейме. Паколькі гэтыя асобы не хацелі далучыцца да нас, то для мяне зусім зразумела, навошта створаная новая група. Паколькі ў існуючай з 2005 года парламенцкай групе па справах Беларусі пытанні парушэння правоў чалавека, парушэння прынцыпаў дэмакратыі і падтрымка дэмакратычнай беларускай апазіцыі з'яўляюцца асноўнымі, то цалкам відавочна, што дэпутат Чыквін і яго супрацоўнікі не хочуць мець нічога агульнага з напрамкам дзейнасці, які заключаецца ў падтрымцы дэмакратыі і людзей, якія пераследуюцца».