У Віцебску хочуць пабудаваць «Еўрапейскі Галівуд»

На месцы парку Тысячагоддзя ў Віцебску прапануецца пабудаваць кінастудыю з 76 элітнымі катэджамі для жылля, паркам з фантанамі і двума здымачнымі павільёнамі і майстэрнямі.

Гэта будзе напаўзамкнёная адасобленая тэрыторыя са сваімі ўнікальнымі поглядамі на кінавытворчасць, а гарадскія ўлады гатовыя даць месца для такой унікальнай забудовы, заяўляе на сваім сайце аўтар праекта Ўладзімір Мунякін.

Мястэчка кіношнікаў, на задуму аўтара, павінен з'явіцца на тэрыторыі плошчай 3 гектары паміж будынкамі тэлезавода і лядовага палаца. Спадар Мунякін ужо зрабіў першаснае пазначэнне тэрыторыі і знаходзіць магчымым размясціць 76 дзялянак. На сёння пакуль ёсць вольныя месцы, пішуць «Народныя навіны Віцебска».

На сайце праекту адзначаецца, што новы пабудаваны катэдж будзе ў 20 разоў таннейшы, чым у Падмаскоўі - ад 50 да 100 тысяч даляраў будуць каштаваць 2-х і 3-павярховыя катэджы. Яны будуць абсталяваныя ўсім патрэбным для жыцця: ацяпленнем і каналізацыяй, святлом і гарачай вадой. На кожны пляц даецца 15 сотак, што, паводле ацэнкі Ўладзіміра Мунякіна, цалкам дастаткова для агародаў будучых жыхароў «Еўрапейскага Галівуда». Зрэшты, адрозна ад стыхійных катэджных будоўляў у мястэчку будуць асаблівыя правілы і нават патрабаванні: перад кожным домам павінны будуць быць размешчаныя клумбы з кветкамі, а надзел азяленены і дагледжаны спрыяльнай абсадай, кустамі, дрэвамі. «Фактычна будзе нямецкая чысціня і галівудская прыгажосць, але па-еўрапейску», - значыцца ў апісанні.

Каб увайсці ў еўрагалівудскі бізнэс, досыць укласці 1 мільён даляраў. Даход плануецца атрымліваць ад здачы ў арэнду павільёнаў, тэхнікі, гатэлю і навучання кінарамяству жыхароў Віцебска. Пры гэтым за кошт больш блізкага размяшчэння да Масквы спадар Мунякін хоча перавабіць кліентаў «Беларусьфільма» з Масквы.

Для першага этапу праекта патрабуецца 20 удзельнікаў, якім, у найгоршым выпадку, прапануецца для пошуку першапачатковага капіталу прадаць кватэру ў Маскве - бо ўсё роўна ў Віцебску яны хутка пабудуюць сабе катэдж у некалькі ўзроўняў.

На віцебскай кінафабрыцы, адрозна ад амерыканскага Галівуда, Уладзімір Мунякін думае здымаць разумныя фільмы для разважных людзей, а не для забавы і бавення. Пазбавіўшыся тут ад дыктату прадусараў, рэжысёры змогуць ажыццявіць свае мары - здымаць аўтарскія фільмы.

За адзін з чыннікаў, які можа прывабіць інвестараў, спадар Мунякін уважае прытачнае тэрытарыяльнае становішча Віцебска ў самым цэнтры Еўропы: да Масквы 505 км, да Санкт-Пецярбурга - 625 км, да Кіева - 580 км, да Рыгі - 500 км, да Вільні - 350 км. Памятаецца, падобная аргументацыя была ў канцы XX стагоддзя ў аўтара ідэі стварыць пад Віцебскам міжнародны касмадром.