У Віцебскім ІЧУ памёр арыштант

50-гадовы мужчына быў затрыманы за дробнае хуліганства.

Факт раптоўнай смерці ў Віцебскім ІЧУ затрыманага за адміністрацыйнае парушэнне арт. 17.1 КаАП (дробнае хуліганства) 50-гадовага Ігара Кудзелкі выяўлены пры правядзенні маніторынгу месцаў прымусовага ўтрымання, паведамляе ЧКПУ «Платформ інавейшн».

Як паведамляецца на сайце праваабаронцаў, 28 снежня мінулага года Кудзелка пасля «п'янага» сямейнага скандалу быў затрыманы супрацоўнікамі міліцыі і змешчаны ў спецыялізаваны ізалятар (выцвярэзнік). Перад гэтым яго агледзелі медработнікі, праблем са здароўем, акрамя стану алкагольнага ап'янення, у парушальніка выяўлена не было. Пасля заканчэння знаходжання ў выцвярэзніку Кудзелка паўторна быў агледжаны медыкамі, скаргаў на дрэннае самаадчуванне ён не выказваў і да разгляду справы аб адміністрацыйным правапарушэнні ён быў пераведзены ў ІЧУ УУС Віцебскага аблвыканкама.

Паводле звестак, атрыманых супрацоўнікамі маніторынгавай групы, 29 снежня Кудзелка адчуў сябе дрэнна, яму выклікалі хуткую дапамогу. Да прыбыцця лекараў затрыманаму аказвалася першая дапамога медыцынскімі работнікамі ІЧУ, аднак «хуткая», якая прыбыла, канстатавала смерць арыштанта.

Цяпер цела Кудзелкі знаходзіцца ў аддзяленні судова-медыцынскай экспертызы Віцебска. Бачных пашкоджанняў і прыкмет гвалтоўнай смерці на целе памерлага не знойдзена, прычыны смерці ўстанаўліваюцца.

Паводле факта смерці адміністрацыйна затрыманага праводзіцца праверка.

Загінулы працаваў мулярам на адным з прадпрыемстваў горада.