Штрафы за «дармаедства» прывядуць да зыходу з Беларусі мільёнаў гастарбайтэраў

Яны перастануць карміць сваіх бацькоў, дзяцей і жонак.

Краіна атрымае войска галодных утрыманцаў, не здольных працаваць, піша ucpb.org.

МУС прапаноўвае штрафаваць паўналетніх працаздольных грамадзян, якія стала жывуць у Беларусі і больш за 6 месяцаў у год ўхіляюцца ад выплаты падаткаў, пошлін і іншых плацяжоў. Для злосных ухілістаў прапануецца ўвесці арышт з абавязковым прыцягненнем да працы. Пра гэта паведамляе ўпраўленне інфармацыі і грамадскіх сувязей МУС.

Чаго даб'ецца рэжым са сваім законам аб дармаедстве? Таго, што грамадзяне, якія працуюць у Расеі, перастануць прыязджаць сюды наогул, нават да сем'яў - каб не наскочыць на аблаву якую. І скончыцца гэта тым, што сем'і будуць канчаткова разбураныя, работнікі з часам легалізуюцца ў РФ. Беларусь страціць мільён работнікаў - актыўных, гатовых працаваць, на чые рукі і галаву ёсць попыт.

У выніку, на балансе дзяржавы застануцца жанчыны, старыя і дзеці, якіх цяпер гэты мільён гастарбайтэраў корміць.

Калі краіна хоча палепшыць эканамічную сітуацыю, неабходна ствараць новыя эфектыўныя працоўныя месцы, а для гэтага трэба прыцягваць інвестыцыі і тэхналогіі, а значыць, мяняць сістэму. Але гэта - калі хоча палепшыць.

Рэжым аднак думае, што ён выбудоўвае юрыдычную базу каб пасадзіць такіх, як Вінаградаў, а наступстваў сваіх, як мінімум, вельмі нязграбных дзеянняў і вар'яцкіх ідэй не бачыць.