Кангрэс ЗША разгледзіць пытанне аб прадстаўленні Украіне зброі
28- 17.11.2014, 17:21
- 16,479
Закон аб ленд-лізе разглядае перадачу Украіне зброі, боепрыпасаў і іншых відаў узбраення для супрацьстаяння расейскай агрэсіі.
Яго аўтар - рэспубліканец Майкл Берджэс - перакананы, што адной фінансавай дапамогі ў сітуацыі, якая склалася, ужо недастаткова, паведамляе «Голас Амерыкі».
«Украінцы хочуць жыць у аб'яднанай, незалежнай, стабільнай і квітнеючай дэмакратыі. І, без сумневу, вайна на Данбасе ўскладняе рэфарматарскія намаганні. Расейская агрэсія зрабіла Украіну больш аб'яднанай, больш дэмакратычнай і, што іранічна, больш празаходняй. Вынікі апошніх выбараў гэта пацвердзілі», - сказаў ён.
Прадстаўнік Рэспубліканскай партыі заклікаў дапамагчы Украіне ў яе імкненні да свабоды і дэмакратыі.
«Кангрэс стаіць на пазіцыі салідарнасці з Украінай. ЗША ўжо падалі фінансавую і матэрыяльную дапамогу Украіне, але прымаючы пад увагу пастаянную агрэсію і адсутнасць павагі да мірнага плану, якія будуць дэманстравацца Расеяй, Украіна мае патрэбу ў большым, чым грошы. Украіне трэба зброя, боепрыпасы, бронекамізэлькі і сродкі сувязі, - адзначыў кангрэсмэн. - Безумоўна, фінансавая дапамога важная, але таксама важная зброя і боепрыпасы, каб адбіць расейскія войскі, якія ўварваліся ў суверэнную краіну».
Законапраект Майкла Берджэса HR 5315 прапануе па праграме ленд-ліза даць прэзідэнту ЗША права перадаць зброю Украіне. У выпадку, калі законапраект будзе прыняты, Украіна можа разлічваць на процітанкавую і супрацьпаветраную зброю, боепрыпасы, штурмавыя і снайперскія вінтоўкі, іншую стралковую зброю, гранатамёты, кулямёты, сістэмы кіравання агнём, бронекамізэлькі, шматмэтавыя аўтамабілі і многае іншае.