Дзіўная ініцыятыва на фоне Майдана

Еўразвяз зноў спрабуе выратаваць Лукашэнку.

Такім чынам лідар грамадзянскай кампаніі «Еўрапейская Беларусь» кандыдат у прэзідэнты на выбарах 2010 года Андрэй Саннікаў пракаментаваў charter97.org візіт у Менск кіраўніка дэпартамента Усходняга партнёрства Еўрапейскай службы знешніх дзеянняў, які абвясціў, што Брусель мае намер запусціць так званую «Часовую фазу» («Interim phase») супрацоўніцтва з беларускімі ўладамі:

- Візіт кіраўніка дэпартамента «Усходняга партнёрства» Дзірка Шубеля быў нечаканым і, мякка кажучы, дзіўным, асабліва на фоне падзей ва Украіне. Падобна на тое, ён прывёз у Менск прапановы, якія датычацца развіцця адносінаў з дыктатарскім рэжымам.

Тое, што ў гэтых прапановах згадваецца грамадзянская супольнасць - даніна рытуалу, а не нейкія крокі па сутнасці. Звяртае на сябе ўвагу тое, што кіраўнік дэпартамента пазначыў тыя напрамкі, у якіх больш за ўсё мае патрэбу дыктатура - інвестыцыі і гандаль. З боку Еўразвяза падобная ініцыятыва - гэта проста мадэрнізацыя палітыкі «ўцягвання». ЕЗ з зайздроснай упартасцю спрабуе паўтараць усё тыя ж памылкі, якія ўжо былі зробленыя ў Беларусі.

Падобныя памылкі паспрыялі развіццю трагічных падзей ва Украіне, паколькі там таксама стаўка рабілася на аўтарытарныя ўлады і на мадэрнізацыю праз дамоўленасці з непрадказальным партнёрам.

Можна ўзгадаць такія ж спробы ЕЗ у дачыненні да Кадафі і Асада. Мы ведаем, да чаго гэта прывяло. Наогул складаецца ўражанне, што калі палітыкі Еўразвяза хоць і павольна, але спрабуюць прааналізаваць украінскія падзеі, падзеі ў рэгіёне «Усходняга партнёрства» і прыняць нейкія адэкватныя рашэнні, еўрапейская бюракратыя актывізуецца менавіта на супрацьлеглым кірунку, які ўжо не раз прыводзіў да трагічных наступстваў, у тым ліку і ў Беларусі.

«Мадэрнізацыя мадэрнізацыі «якая хаваецца пад назвай «часовая фаза» прывядзе да абнаўлення і аснашчэння карнага апарату дыктатуры. Можна ўспомніць, што такое мы таксама ўжо праходзілі. Менавіта нямецкія спецыялісты навучалі спецслужбы і супрацоўнікаў МУС Беларусі таму, як змагацца з тэрарызмам, што ў нашай сітуацыі азначае барацьбу з апазіцыяй. Мы бачым, што сёння ў Кіеве «Беркут» добра аснашчаны менавіта заходнім абмундзіраваннем, выкарыстоўваюцца кулі пераважна заходняй вытворчасці.

Тое ж самае мы паблізу бачылі і адчувалі пры разгоне Плошчы, калі спецназ, АМАП быў экіпіяваны відавочна не беларускімі вырабамі.

Еўрапейскія бюракраты зноў спрабуюць прыдумаць нейкія далёкія ад рэальнасці і нават нежыццяўляльныя стратэгіі, каб дапамагчы не Беларусі, а дыктатуры. Прывозяць гатовымі, абмеркаваўшы іх з прадстаўнікамі дыктатара, не раячыся пры гэтым ні з апазіцыяй, ні з былымі палітычнымі вязнямі і членамі іх сем'яў, якія сёння маюць большае права выказаць сваё меркаванне і сваё бачанне сітуацыі і растлумачыць, да чаго прыводзяць непрадуманыя крокі ЕЗ, - заявіў Андрэй Саннікаў.