21 красавiка 2019, Нядзеля, 6:15
За нашу і вашу свабоду!
Рубрыкі

Актывіст, які выйшаў з турмы: На Акрэсціна 250 апазіцыянераў

12

Актывісты, якія выйшлі на свабоду, паведамляюць пра сотні арыштаваных перад ЧС.

Пра затрыманне Мікалая Бабушкіна стала вядома толькі пасля яго вызвалення.

Ён распавёў новыя факты пра прэвентыўныя затрыманні актывістаў напярэдадні і падчас чэмпіянату свету па хакеі ў Менску, піша сайт ПЦ «Вясна».

Мікалай Бабушкін распавёў, што быў затрыманы 8 траўня каля рэстарана «Макдональдс» на праспекце Незалежнасці. Супрацоўнікі АМАПа звярнулі ўвагу на ярлык з сімволікай Еўрамайдана. Пры затрыманні актывісту «Моладзі БНФ» не дазволілі паведаміць сваякам па тэлефоне пра тое, што здарылася. Суд адбыўся ў нядзелю, 11 траўня. Як яму патлумачылі супрацоўнікі міліцыі, зараз вельмі шмат затрыманняў, таму суды праходзяць нават у выходныя дні.

Суддзя суда Цэнтральнага раёна Менска Вікторыя Шабуня пакарала актывіста арыштам на 5 сутак за дробнае хуліганства (арт.17.1 КоАП).

Падчас адбыцця пакарання на Акрэсціна Бабушкіна апыталі супрацоўнікі КДБ. Іх цікавіла, ці ведае ён тэхналогіі вырабу выбухоўкі, а таксама мэты яго знаходжання на Еўрамайдане ў Кіеве, дзе студэнт быў некалькі дзён у пачатку сакавіка.

Мікалай Бабушкін таксама распавёў праваабаронцам, што чуў ад іншых арыштаваных актывістаў, што перад чэмпіянатам свету асудзілі значна больш людзей, чым пра гэта вядома праваабаронцам: каля 250 мужчын. Закрыты ўладамі ПЦ «Вясна» паведамляў пра 30 затрыманых.

Як паведаміў Бабушкін, арыштаваных, якіх у гэтым годзе прыцягвалі па артыкуле 17.3 КоАП (распіццё алкагольных напояў у грамадскім месцы або з'яўленне ў грамадскім месцы ў стане ап'янення), адразу пасля адбыцця адміністрацыйнага пакарання з Акрэсціна адвозяць у суд і ў той жа дзень накіроўваюць у лячэбна-працоўны прафілакторый (ЛПП).

У Беларусі за кратамі знаходзяцца восем арыштаваных на працяглыя тэрміны палітвязняў, у тым ліку былы кандыдат у прэзідэнты Мікалай Статкевіч і віцэ-прэзідэнт Міжнароднай федэрацыі правоў чалавека Алесь Бяляцкі. Акрамя таго, на працягу апошніх двух тыдняў супрацоўнікамі міліцыі былі затрыманыя дзесяткі актывістаў апазіцыі. Праваабаронцы звязваюць арышты з правядзеннем чэмпіянату свету па хакеі ў Менску.