Пракаповіч: Умовы імпарту ў Беларусь трэба зрабіць больш жорсткім

Віцэ-прэм'ер мяркуе, што імпартныя тавары карыстаюцца прывілеяваным становішчам.

У Беларусі дзель імпартных тавараў у гандлёвых аб'ектах не будуць абмяжоўваць да 15%. Пра гэта паведаміў намеснік прэм'ер-міністра Пётр Пракаповіч, піша БелТА.

"Ніхто не будзе загадваць гандлёвым аб'ектам, трымаць дзель імпарту ў 85% або ў 15%. Аднак мы павінны ствараць такія ўмовы, каб беларускія тавары станавіліся больш якаснымі і канкурэнтаздольнымі", - сказаў Пётр Пракаповіч.

Віцэ-прэм'ер мяркуе, што варта зрабіць больш жорсткімі ўмовы паставак з-за мяжы. Паводле ягоных слоў, імпартныя тавары карыстаюцца ў Беларусі прывілеяваным становішчам. "Прадпрымальнікі іх увозяць без афармлення і выплаты мыт, у выніку чаго замежная прадукцыя становіцца таннейшай, чым айчынная. Мы павінны пераламаць сітуацыю, якая склалася, тады канкурэнцыя стане нармальнай", - падкрэсліў Пётр Пракаповіч.

Намеснік прэм'ер-міністра адзначыў, што нават 15% - дастатковая дзель імпартнай прадукцыі для беларускага рынку, якая дазваляе дасягнуць ідэальнага ўзаемадзеяння. "Без імпарту нельга. Мы павінны мець узоры замежных тавараў, каб ведаць, на што арыентавацца, - растлумачыў ён. - Пры гэтым трэба зрабіць усё магчымае, каб гандлёвыя сеткі спрабавалі ўзяць на рэалізацыю як мага больш беларускіх тавараў. Беларуская прадукцыя канкурэнтаздольная, і я ўпэўнены, што айчынныя прадпрыемствы могуць прапанаваць годную альтэрнатыву".

Як паведамлялася, прэм'ер-міністр Міхаіл Мясніковіч, наведваючы 18 чэрвеня менскае ААТ "Трыкатажгандаль", выказаў меркаванне, што аптымальная прапорцыя імпартных і айчынных тавараў на рынку Беларусі павінна складаць прыкладна 15% на 85%. Днём пазней намеснік старшыні Менгарвыканкама Андрэй Дамарацкі правёў нараду ў пытаннях далейшага развіцця спажывецкага рынку сталіцы. На ім было дадзенае даручэнне аб павелічэнні ўдзельнай вагі тавараў айчыннай вытворчасці да 85% як у крамах, так і аб'ектах грамадскага харчавання.

Фота: onliner.by