Дыктатар асудзіў «культ спажывецтва» ў беларусаў

Лукашэнка, вядомы сваёй любоўю да раскошы, крытыкуе беларусаў.

«Глабалізацыя свету мае як станоўчыя, так і негатыўныя наступствы. У многіх краінах Захаду адзначаецца маральная дэградацыя грамадства, адмова ад хрысціянскіх прынцыпаў маралі, разбурэнне сямейных асноў», - заявіў Лукашэнка ў аўторак у Менску на сустрэчы з удзельнікамі Еўрапейскага праваслаўна-каталіцкага форуму «Рэлігія і культурная разнастайнасць: выклікі хрысціянскім цэрквам у Еўропе».

«Культ спажывецтва, пагоня за задавальненнямі становяцца рэальнымі пагрозамі духоўнага выраджэння людзей і недасканалай трансфармацыі дзяржаў», - цытуе Лукашэнку «Інтэрфакс-Захад».

Дыктатар заявіў, што гэтыя маральныя дэфармацыі закранулі і беларусаў.

«І ў нашай краіне, як і ўсюды ў свеце, праявы сусветнага эканамічнага крызісу спалучаныя з гуманітарнымі праблемамі. На жаль, маральныя дэфармацыі, якія прагрэсуюць небывалымі тэмпамі, не змаглі не закрануць і нашых людзей», - канстатаваў Лукашэнка.

Паводле слоў Лукашэнкі, перад беларускім грамадствам стаяць такія ж сур'ёзныя задачы, як і перад любой еўрапейскай краінай. «Нам неабходна ўмацаванне маральнасці і высокай духоўнасці. Нас турбуе распаўсюджванне п'янства і наркаманіі, праблемы сацыяльнага сіроцтва і іншыя непрывабныя з'явы сучаснасці», - сказаў ён.

На яго погляд, «прыйшоў час успомніць, што менавіта хрысціянскі светапогляд з'яўляецца галоўным культурастваральным фактарам, які сфармаваў саму еўрапейскую цывілізацыю». «Рашэнне многіх жыццёва важных пытанняў немагчыма без актыўнага ўдзелу праваслаўных і каталікоў», - упэўнены ён. «І тое, што Праваслаўная і Каталіцкая цэрквы Еўропы імкнуцца сумеснымі намаганнямі арганізаваць пошук новых форм міжхрысціянскай салідарнасці, - гэта вельмі важна і абнадзейліва», - падкрэсліў Лукашэнка.