Макей заступіўся за Валерыю і Кабзона

Кіраўнік МЗС Беларусі назваў «бязглуздзіцай» забарону на ўезд у Латвію для Газманава, Кабзона ды Валерыі.

Пра гэта ён заявіў у інтэрв'ю СТВ.

«Я разглядаю гэта як абсалютнай бязглуздзіцай. Бо гэта практычна дэвальвуе ўсе заявы еўрапейцаў пра нейкія «дэмакратычныя каштоўнасці». Яны кажуць пра свабоду выказвання меркаванняў, пра свабоду слова. Гэта значыць, атрымліваецца, што журналісты, якія льюць бруд на ўладу, таўруюць уладу ганьбай, - гэта з'яўляецца адлюстраваннем свабоды выказвання меркаванняў і свабоды слова. Але журналіст, які выказвае свой пункт гледжання і крытыкуе палітыку Брусэля, гэта ўжо - «найміт рэжыму», і яго трэба ўключаць у «санкцыйныя спісы».

Тое самае адбываецца і ў гэтым выпадку з прадстаўнікамі творчай інтэлігенцыі. Кожны з іх мае права на свабоду свайго ўласнага меркавання, і яны выказваюць сваё меркаванне. Што ў гэтым дрэннага? Таму такімі крокамі - я не крытыкую ў гэтым выпадку ўлады Латвіі, а кажу агулам, канстатую факт, што называецца... Я мяркую, што ў гэтым выпадку гэта - такое адлюстраванне падвойных падыходаў і пэўнай крывадушнасці з боку нашых еўрапейскіх партнёраў. І абсалютна, мяркую, ненармальна у гэтым выпадку ўжываць такія метады ўздзеяння на прадстаўнікоў творчай інтэлігенцыі. Яны маюць дакладна такое ж права на выказванне меркаванняў, як і кожны іншы чалавек» - заявіў ён.

Нагадаем, міністр замежных спраў Латвіі Эдгар Рынкевіч прыняў пастанову на нявызначаны час уключыць у спіс асобаў, якім забаронены ўезд у Латвію, расейскіх музыкаў Алега Газманава, Іосіфа Кабзона і Алу Перфілаву, больш вядомую пад сцэнічным псеўданімам Валерыя.

У МЗС Латвіі сцвярджаюць, што гэтыя асобы сваімі дзеяннямі спрыялі парушэнню тэрытарыяльнай цэласнасці і суверэнітэту Украіны.

Фота: Reuters