Лукашэнка на сустрэчы з Кучмам: Пасярэдніцтва не выношу наогул
13- 31.07.2014, 14:39
- 24,658
Экс-прэзідэнт Украіны Леанід Кучма прыбыў на трохстароннюю сустрэчу ў Менск аб Украіне, а перад ёй пагутарыў з беларускім дыктатарам.
Пра гэта паведамляе БелТА.
Падчас сустрэчы Лукашэнка заявіў, што "наогул не церпіць пасярэдніцтва".
"Вы не чытайце і не слухайце, што тут усялякія кажуць пра нейкі піяры, іміджы. Нам нічога гэтага не трэба. Вы гэта добра ведаеце", - падкрэсліў ён.
"Пасярэдніцтва я не выношу наогул. Мы будзем разам з вамі рабіць для нашай Украіны ўсё патрэбнае, каб хоць неяк знізіць напал супрацьстаяння на ўсходзе Украіны. Мы ў гэтым вельмі зацікаўленыя", - дадаў Лукашэнка.
Нагадаем, у Менску сёння альбо заўтра адбудзецца пасяджэнне трохстаронняй кантактнай групы аб урэгуляванні сітуацыі на ўсходзе Украіны.
У гэтай сустрэчы плануецца ўдзел другога прэзідэнта Украіны Леаніда Кучмы, пасла Расеі ва Украіне Міхаіла Зурабава і прадстаўніка АБСЕ.
29 ліпеня Лукашэнка пагадзіўся зрабіць Менск пляцоўкай для перамоваў для развязання ўкраінскага крызісу. Як паведамілі ў прэс-службе беларускага прэзідэнта, такую прапанову яму зрабіў праз тэлефон прэзідэнт Украіны Пётр Парашэнка.
Са слоў Парашэнкі, прапануецца вынесці на абмеркаванне кантактнай групы два пытанні - аб вызваленні ўсіх закладнікаў, якія застаюцца ў баевікоў, і аб забеспячэнні допуску міжнародных экспэртаў на месца падзення самалёта "малайзійскіх авіяліній". Ён адзначыў, што ў пытанні закладнікаў трэба дзейнічаць хутка, бо сярод іх ёсць параненыя, якія маюць патрэбу ў медыцынскай дапамозе.