«Уралкалій» і «Беларуськалій» не дамовяцца ў 2014 годзе
- 19.08.2014, 15:32
- 5,462
Кампаніям пакуль не ўдалося ўрэгуляваць пытанні, якія ўзніклі ў сярэдзіне 2013 года.
«Уралкалій» і «Беларуськалій» не змогуць стварыць у 2014 годзе сумеснае прадпрыемства для продажаў прадукцыі на сусветным рынку, паведамляе Bloomberg са спасылкай на крыніцы Argus FMB Potash.
Кампаніям пакуль не ўдалося ўрэгуляваць пытанні, якія ўзніклі ў сярэдзіне 2013 года, калі «Уралкалій» заявіў аб выхадзе з СП з беларускай кампаніяй, змене стратэгіі на «аб'ём больш значны за кошт» і зніжэнні кошту на калій з 400 да менш чым 300 даляраў за тону.
У прыватнасці, кампаніі спрачаюцца аб размеркаванні выручкі ад грузавых перавозак і плаце за прастойванне тлумачыць агенцтва.
Акрамя таго, адзначаецца, што за сем месяцаў 2014 экспарт беларускага калію вырас у параўнанні з тым жа перыядам годам раней на 50 адсоткаў да 5,6 млн тон.
У чэрвені гэтага года генеральны дырэктар «Уралкалія» Дзмітрый Восіпаў заяўляў, што аб формах супрацоўніцтва з «Беларуськаліем» казаць рана, назваўшы сустрэчу Дзмітрыя Мазепіна (уладальніка групы «Уралхім», якому належыць 20% акцый расейскай калійнай кампаніі) і Аляксандра Лукашэнкі «вельмі папярэдняй стадыяй перамоваў», паведамляе ІТАР-ТАСС.
Улетку 2013 года «Уралкалій» выйшаў з Беларускай калійнай кампаніі (БКК) - трэйдарскага СП з дзяржаўнай беларускай кампаніяй «Беларуськалій». Пастанова «Уралкалія» абрынула рынак калійных угнаенняў: кошты на прадукцыю ўпалі на траціну, найбуйнейшыя сусветныя вытворцы калійных угнаенняў страцілі мільярды даляраў капіталізацыі. Пасля гэтага ў дачыненні да шэрагу службовых асоб БКК, у тым ліку, Уладзіслава Баўмгертнера, які знаходзіўся ў той момант на пасадзе гендырэктара «Уралкалія», у Беларусі была распачатая крымінальная справа аб злоўжыванні службовымі паўнамоцтвамі.
Таксама ўлады Беларусі абвясцілі ў вышук чатырох мэнэджараў «Уралкалія», якія знаходзіліся на ключавых пазіцыях у БКК і займаліся продажамі. Канфлікт вакол «Уралкалія» ў выніку прывёў да змены асноўных акцыянераў кампаніі. У прыватнасці, фонд Сулеймана Керымава Suleyman Kerimov Foundation прадаў свае акцыі ОНЭКСИМу Міхаіла Прохарава, іншым буйным акцыянерам стаў «Уралхім» Дзмітрыя Мазепіна.
«Уралкалій» - адзін з вядучых сусветных вытворцаў калію. Вытворчыя актывы кампаніі ўключаюць пяць руднікоў і сем абагачальных фабрык, размешчаных у гарадах Бярэзнікі і Салікамск (Пермскі край).
