Пуцін прыляцеў у Менск са спазненнем на гадзіну
47- 26.08.2014, 14:21
- 30,427
Прэзідэнт Расеі прыбыў у Менск.
Сёння ў сталіцы Беларусі праходзіць саміт Мытны саюз - Украіна, піша «Інтэрфакс».
У сустрэчы таксама возьмуць удзел тры еўракамісары - вярхоўная прадстаўніца ЕЗ у замежных справах Кэтрын Эштан, еўракамісар у гандлі Карэл дэ Гюхт і намеснік кіраўніка Еўракамісіі – камісар у пытаннях энэргетыкі Гюнтэр Этынгер.
Гэта будзе другая за апошнія тры месяцы сустрэча Уладзіміра Пуціна з прэзідэнтам Украіны Пятром Парашэнкам, арганізаваная пры дапамозе трэцяй дзяржавы. Аднак дагэтуль няма афіцыйнага пацверджання таго, ці адбудзецца іх асобная размова.
Першая асабістая сустрэча прэзідэнтаў РФ і Украіны адбылася ў пачатку чэрвеня на ўрачыстасцях з нагоды 70-годдзя высадкі хаўруснікаў у Нармандыі. Тады яны толькі коратка пагаварылі ў прысутнасці канцлеркі Нямеччы Ангелы Мэркель і прэзідэнта Францыі Франсуа Аланда.
У Пуціна таксама запланаваны шэраг двухбаковых сустрэч. Як раней паведаміў прэс-сакратар прэзідэнта РФ Дзмітрый Пяскоў, не выключана, што расейскі лідэр пагутарыць і з прэзідэнтам Украіны.
"На гэтай сустрэчы, калі яна ўсё ж будзе, мы чакаем, перш за ўсё, шчырай размовы аб пытанні ўрэгулявання ўкраінскага крызісу, аб гуманітарных пытаннях", - сказаў Пяскоў.
Агулам у парадку дня саміту ў Менску - тэмы пераадолення гуманітарнага крызісу на ўсходзе Украіны і аднаўленне палітычнага дыялогу ў гэтай краіне. Прадстаўнікі ЕЗ таксама выказваліся за абмеркаванне пытанняў, звязаных з выкананнем пагаднення аб Асацыяцыі паміж Украінай і Еўразвязам, а таксама праблемы энэргетычнай бяспекі.
На пытанне, ці гатовы расейскі бок абмяркоўваць у Менску газавую тэматыку, прэс-сакратар прэзідэнта РФ адзначаў, што "газавае пытанне з'яўляецца, безумоўна, важным складнікам парадку дня нашых двухбаковых стасункаў".
Фота: Reuters/Vasily Fedosenko