Лукашэнка мае сумнеў у сілавіках

Дыктатар ужо не ўпэўнены ў тым, што праваахоўныя органы не будуць выкарыстоўваць законы ў мэтах нажывы.

Дасудовае пагадненне аб супрацоўніцтве закліканае павысіць раскрывальнасць злачынстваў, а не стаць сродкам для змяншэння тэрмінаў крымінальным элементам. Пра гэта заявіў Лукашэнка сёння на нарадзе паводле праекту закона, які прадугледжвае комплексную карэктыроўку крымінальнага і крымінальна-працэсуальнага заканадаўства, паведамляе БелТА.

Як адзначыў дыктатар, дасудовае пагадненне аб супрацоўніцтве выклікала шмат дыскусій. З ягоных слоў, адразу ўзнікае пытанне: а ці не заваляць злачынцы следчыя органы "казкамі" пра ўяўных змоўшчыкаў? "Ці не будуць агаворваць каго заўгодна для выратавання сваёй шкуры? Ці не стане такое пагадненне для асабліва небяспечных крымінальных элементаў спосабам пазбегнуць строгай заслужанай адказнасці? - пацікавіўся Лукашэнка. - І давайце шчыра: ці ўпэўненыя мы ў сваіх праваахоўніках, у тым, што яны будуць ужываць такое пагадненне менавіта ў законных мэтах? А не для ўласнай нажывы, атрымліваючы адкаты пры ўкладанні пагадненняў аб супрацоўніцтве за цалкам легальную палёгку лёсу злачынцаў".

Лукашэнка пацікавіўся, ці сапраўды ў канчатковым выніку гэты інструмент павысіць раскрывальнасць злачынстваў і наколькі эфектыўна ён будзе дзейнічаць. Ён сказаў, што трэба выразна прадставіць адказы на ўсе гэтыя пытанні і мець цвёрдую ўпэўненасць у правільнасці заданага праектам вектара ўдасканалення крымінальнага і крымінальна-працэсуальнага заканадаўства.