Вясёлы калькулятар: ЦВК прамінулай датай выправіў вынікі «выбараў»

Блогеры звярнулі ўвагу на відавочныя ляпы ў апублікаванай на сайце ЦВК статыстыцы. У выніку, спецыялісты з ЦВК проста прамінулай датай выправілі вынікі.

Падрабязную статыстыку аб папярэдніх выніках галасавання ў Беларусі на сайце ЦВК вывешваюць менш чым праз дзень пасля закрыцця ўчасткаў: агульная колькасць выбаршчыкаў ва ўсіх раёнах краіны, колькасць тых, хто прагаласаваў, адсотак прыходу, колькасць галасоў за кожнага з кандыдатаў (у лічбах і адсотках), а таксама колькасць тых, хто прагаласаваў супраць усіх. Калі падлічыць у адсотках, атрымліваецца крыху менш за 100 - 99,6, 99,3, 98,7. Розніца - гэта сапсаваныя бюлетэні, піша "Беларускі партызан".

Як піша блогер Kireev у "Жывым журнале", напрыклад, у Маскоўскім раёне Берасця наогул не было несапраўдных. Але пасля публікацыі блогераў і ўвагі СМІ адбыліся цудоўныя змены. Цяпер жа з'явіліся 1274 несапраўдныя бюлетэні. А ў графе "супраць усіх" паменшылася з 10 543 да 9253 галасоў.

"А астатнія яны ўзялі з агульнай колькасці тых, хто прагаласаваў, якая была 129 045, а стала 129 029. Альбо ў Менскім раёне несапраўдных не было ўвогуле. А цяпер там значныя 20 несапраўдных. Мякка кажучы, замала, вядома, для такога вялікага раёна, дзе прагаласавала 130 тысяч чалавек! А "супраць усіх" было 6 815, а стала 6 795: 20 галасоў адтуль прыбралі", - піша блогер.

Дарэчы, у Маладзечанскім раёне наважыліся пайсці на рэкорд: замест нуля несапраўдных адразу 1 681 напісалі. І роўна столькі ж прыбралі з "супраць усіх".

Такія маніпуляцыі назіраюцца на многіх выбарчых участках ва ўсёй краіне.

Напрыклад, з 83 236 чалавек, якія прагаласавалі на выбарах у Савецкім раёне Менска, ніводзін не змог сапсаваць свой бюлетэнь. Як такое магло адбыцца - абсалютная загадка.

Праўда, ужо ў другой палове дня 13 кастрычніка сапсаваныя бюлетэні ў Савецкім раёне ўсё ж з'яўляюцца - 751. З графы - "супраць усіх". Калі яшчэ раніцай 13 кастрычніка там было 18 364 галасы, то цяпер стала 17 608. На 756 менш. Яшчэ 3 галасы забралі ў Гайдукевіча, Караткевіч дадалі 5, Лукашэнку дадалі 7 галасоў, Улаховічу прыплюсавалі 3. Колькасць асоб, якія ўзялі ўдзел у галасаванні, змянілася з 83 236 чалавек да 83 243. Гэта значыць вырасла на 7 чалавек. Усё сышлося.