Алег Воўчак: «Выбары» першапачаткова былі незаконнымі праз удзел у іх Лукашэнкі

Пасля «рэферэндуму» 2004 года грамадзянін дыктатар не мае права вылучаць сваю кандыдатуру.

Такое меркаванне сайту charter97.org выказаў кіраўнік праваабарончага цэнтра «Прававая дапамога насельніцтву» Алег Воўчак, каментуючы вынікі «выбараў» - 2015 у Беларусі:

- Я падтрымліваю афіцыйную справаздачу АБСЕ, у якой гаворыцца, што гэтая «кампанія» не адпавядала міжнародным патрабаванням і стандартам.

Калі пераходзіць на канкрэтныя парушэнні, то на першай стадыі былі выключаныя з удзелу дэмакратычныя кандыдаты, а прадстаўнікі грамадзянскай супольнасці не ўвайшлі ў выбарчыя камісіі.

Другое: калі рэгістраваліся «кандыдаты», Аляксандр Лукашэнка, згодна з заканадаўствам, павінен быў сысці ў адпачынак - прынамсі, менш з'яўляцца на тэлевізіі, каб былі створаныя роўныя ўмовы.

Самыя вялікія пытанні ўзніклі аб датэрміновым галасаванні. Яно наогул павінна сысці ў нябыт, бо асноўныя фальсіфікацыі адбываюцца менавіта на датэрміновым галасаванні. І ў гэты раз практыка паказала, што ўкідванні бюлетэняў адбываліся якраз у гэтыя пяць дзён.

Што яшчэ ўразіла: вялікая колькасць незалежных назіральнікаў былі выдаленыя з участкаў. Тыя, хто засталіся, не маглі сачыць за «падлікам» галасоў, бо іх трымалі на вялікай адлегласці ад сталоў камісіі.

Як і ў папярэднія гады, ніхто не лічыў асобна датэрміновае галасаванне - усё лічылася разам, назіральнікі не мелі магчымасці бачыць, за каго галасуюць, бо бюлетэні не раскладваліся ў стосы.

Далёка не ўсе камісіі рабілі справаздачу кожны дзень, колькі выбаршчыкаў прагаласавала. Таму прыход праверыць было складана, і тое што фіксавалі назіральнікі, мае вялікія разыходжанні з тымі лічбамі, што ў выніку назвалі ў камісіях.

Празрыстасці не было, вынікі «выбараў» пастаўленыя пад сумнеў не толькі назіральнікамі з Беларусі, але і міжнароднымі экспэртамі, якія там прысутнічалі.

Агулам маё меркаванне як праваабаронцы: у гэтых «выбарах» Аляксандр Лукашэнка не меў права ўдзельнічаць, бо рэферэндум 2004 года ён правёў з парушэннем Канстытуцыі і міжнародных дамоўленасцей. І Венецыянская камісія Рады Еўропы вынесла пастанову, што рэферэндум нелегітымны і Лукашэнка з таго часу наогул не мае права вылучаць сваю «кандыдатуру».

Я першапачаткова казаў, што гэтыя «выбары» не будуць прызнаныя, і менавіта з такой фармулёўкай: бо ў іх удзельнічае «кандыдат», які не мае на гэта права пасля 2004 года.