Дзясяткі тысяч грамадзян Польшчы атрымаюць зброю
8- 5.06.2015, 18:48
- 15,241
Мінабароны Польшчы пачне ўзбройваць мілітарныя арганізацыі, у якія ўступаюць польскія грамадзяне, што на фоне канфлікту ва Украіне асцерагаюцца нападу Расеі.
Пра гэта паведамляе нямецкая газета Die Welt, піша Инопресса.ру.
Незалежныя мілітарныя арганізацыі накшталт FOP (Федэрацыя абаронных арганізацый) і Strzelec ("Стралец") атрымаюць ад Мінабароны Польшчы ўзбраенне, боепрыпасы і доступ да стрэльбішча. Таксама вайсковыя інструктары такіх арганізацый будуць праходзіць навучанне ў Вышэйшай школе наземных войскаў ва Ўроцлаве, піша Ёрг Вінтэрбаўэр.
Афіцыйна FOP, якую ўзначаліць дарадца Мінабароны Польшчы і NATO ў пытаннях навучання ўкраінскіх вайскоўцаў, былы генерал Багуслаў Пацэк, пачне сваю дзейнасць 17 верасня. У FOP, як гаворыцца ў матэрыяле, увойдзе сем ужо існых польскіх мілітарных арганізацый, якія навучаюць грамадзян страляць са зброі, выкарыстоўваць ручныя гранаты і штурмаваць будынкі. У новай арганізацыі, паводле ацэнкі Пацка, будзе знаходзіцца мінімум 100 тысяч чалавек, а асноўнымі задачамі стануць выхаванне патрыятызму і гатовасці абараняць сваю краіну ў моладзі, дапамога ўладам у мірны час у выпадку надзвычайных сітуацый, да прыкладу, падчас паводак, а таксама выкананне функцый падраздзяленняў тэрытарыяльнай абароны ў выпадку ваенных дзеянняў. Акрамя таго, арганізацыя, як мяркуе Пацэк, зможа дапамагаць цывільнаму насельніцтву, рэгуляваць дарожны рух і нават выконваць вайсковыя функцыі.
Аднак у добраахвотніцкіх мілітарныя аб'яднанняў, заўважае аўтар артыкула, ужо з'явіліся крытыкі, якія патрабуюць ўкласці прызначаныя для "жаўнераў-аматараў" сродкі ў мадэрнізацыю дзейнага войска. Яны падаюць той аргумент, што ў выпадку рэальнай вайны ад гэткіх арганізацый не будзе ніякай стратэгічнай карысці: яны не змогуць супрацьстаяць сучаснаму войску.