Барыс Жаліба: Факт шокавай дэвальвацыі на твар

Ацэнку імкліваму падзенню беларускага рубля даў доктар эканамічных навук, прафесар Барыс Жаліба.

- Факт шокавай дэвальвацыі на твар. Прыкладна такая ж адбылася ў снежні мінулага года, калі расейскі рубель стаў падаць, а мы трымаліся-трымаліся, але потым абваліліся на 30% услед за ім, - сказаў эканаміст «Салідарнасці». - Асноўныя прычыны сённяшняга абвалу - замежныя. Мы бачым зніжэнне коштаў нафты, і працэс пакуль ідзе. Адсюль абвал расейскага рубля, бо экспарт Расеі напалову, напэўна, залежыць ад вуглевадародаў. А паколькі нашы эканомікі ўзаемазвязаныя, то ўслед за ім можна канстатаваць і абвал беларускага рубля.

Аднак можна знайсці прычыны дэвальвацыі і ўнутры нашай эканомікі. Да прыкладу, Нацбанк накшталт не стварае шмат рублёў, але ўсё ж такі апошнімі днямі зрабіў некалькі выпускаў сваіх аблігацый, якія прызначаныя пад свабодныя рублі камерцыйных банкаў. Значыць, была залішняя рублёвая ліквіднасць. Значыць, у сваіх дзеяннях Нацбанку трэба яшчэ сціснуцца. Яшчэ прыклад - Нацбанк залішне актыўна рэкамендаваў банкам зніжаць дэпазітныя рублёвыя працэнты, каб зрабіць таннейшым крэдыты для рэальнага сектара. Можна сказаць, што гэта адбывалася амаль у адміністрацыйна-камандным парадку.

У выніку фундатары сталі пералічваць рублёвыя дэпазіты ў валютныя, ствараць дадатковы ціск на курс рубля.

Барыс Жаліба мяркуе, што ў Нацбанку ёсць інструменты, каб змякчыць удар ад абвалу беларускага рубля, але зрабіць гэта праз замежныя фактары будзе вельмі няпроста. Многае залежыць, як далей будуць змяняцца кошты нафты.

На думку эканаміста, трымаць грошы на рублёвых дэпазітах усё менш сэнсу.

- Пасля шокавай дэвальвацыі надыходзіць перыяд інтэнсіўнай інфляцыі. Таму я б пералічыў ашчаджанні ў валюту.