На Данбасе загінуў яшчэ адзін беларус - капітан Вячаслаў Бараноўскі
15- 31.08.2015, 14:56
- 14,993
29 жніўня ў Чарнігаве пахавалі 38-гадовага Вячаслава Бараноўскага.
Ён служыў у 41 («Чарнігаўскім») батальёне Узброеных Сіл Украіны. Капітан Вячаслаў Бараноўскі загінуў 26 жніўня каля вёскі Старагнатаўка Валнавахскага раёна Данецкай вобласці. Пра гэта паведамляе «Радыё Свабода».
Вячаслаў Бараноўскі нарадзіўся ў беларускай сям'і ў Чарнігаве, скончыў Харкаўскае лётнае вучылішча, служыў лётчыкам, пасля спісання пайшоў добраахвотнікам ваяваць за Украіну на Данбасе. Ягоны бацька Мікалай Іванавіч Бараноўскі быў лётчыкам-выпрабавальнікам, рыхтаваўся ў атрадзе касманаўтаў, родам з Мазыра. На пахаванні сына ён заявіў, што ганарыцца тым, што яны - беларусы шляхецкага роду, што сын змагаўся за свабоду Украіны.
Адпелі Вячаслава Бараноўскага ў Екацярынінскім кафедральным саборы, а пахавалі з вайсковымі ўшанаваннямі на чарнігаўскіх гарадскіх могілках. У яго засталіся жонка і дачка.
Нагадаем, 10 жніўня ў баі пад Белакаменкай на Данбасе быў паранены іншы беларус - Алесь Чаркашын. Ён памёр у лякарні ў Запарожжы пасля некалькіх тыдняў комы. Алесь Чаркашын ваяваў пад пазыўным «Тарас» у тактычнай групе «Беларусь» у складзе Добраахвотнага ўкраінскага корпуса «Правага сектара».