Мясакамбінат выйграў суд у гомельскага сайта за фота каўбасы
7- 27.10.2016, 9:34
- 15,418
Эканамічны суд Гомельскай вобласці 26 кастрычніка вынес пастанову на карысць мясцовага мясакамбіната.
Прадпрыемства судзілася з «Цэнтрам рэгіянальнага развіцця ГДФ» - заснавальнікам сайта gomel.today.
Нагодай для суду стаў артыкул, апублікаваны на сайце «Фотафакт»: паесці і жывот пагладзіць»: на Гомельскім мясакамбінаце зрабілі каўбасу са шкурай і поўсцю ўнутры». Сайт апублікаваў фатаграфію кавалка каўбасы, у якім бачна скура і поўсць. Сам здымак спачатку з'явіўся ў сацыяльнай сетцы «Вконтакте», адзін з карыстальнікаў напісаў, што купіў такую прадукцыю, зробленую на Гомельскім мясакамбінаце.
Навіна мела больш за 20 тысяч праглядаў і шырока абмяркоўвалася ў інтэрнэце. Прадстаўнік ААТ «Гомельскі мясакамбінат» патэлефанаваў у рэдакцыю і паведаміў, што гэткі гатунак каўбасы не вырабляецца з 2015 года. Да таго ж, на фота не відаць этыкеткі мясакамбіната.
Аўтар фота пацвердзіў, што здымак быў зроблены летась. Але кіраўніцтва прадпрыемства наважыла падаць у суд, каб абараніць сваю дзелавую рэпутацыю.
Як паведамляе Радыё «Свабода», у судзе прадстаўнік мясакамбіната заявіў, што няма довадаў таго, быццам каўбаса са скурай і поўсцю на самай справе была выпушчаная на іх прадпрыемстве.
Адказчык намагаў на тым, што іх сайт не з'яўляецца непасрэднай крыніцай інфармацыі і ацэнкі якасці прадукцыі мясакамбіната - гэта зрабіў чытач сайта.
Суд прызнаў правату мясакамбіната. Цэнтр рэгіянальнага развіцця павінен надрукаваць на сайце зняпраўджанне, прынесці прабачэнні і кампенсаваць мясакамбінату судовыя выдаткі сумаю 420 рублёў. Пастанова пакуль не ўвайшла ў законнае дзеянне.
Стваральнікі сайта gomel.today плануюць абскардзіць прысуд.