Лукашэнка хоча прыцягнуць Турцыю да будаўніцтва БелАЭС?
14- 11.11.2016, 14:49
- 14,884
Беларусь і Турцыя падпішуць пагадненне аб супрацоўніцтве ў галіне ядзернай энэргетыкі.
Пра гэта паведамілі ў прэс-службе міністэрства энэргетыкі Беларусі.
«11 лістапада 2016 года, падчас афіцыйнага візіту ў Беларусь прэзідэнта Турцыі Рэджэпа Таіпа Эрдагана, плануецца падпісанне пагаднення паміж урадам Рэспублікі Беларусь і ўрадам Турэцкай Рэспублікі аб супрацоўніцтве ў галіне выкарыстання ядзернай энэргіі ў мірных мэтах», - гаворыцца ў паведамленні.
З беларускага боку пагадненне падпіша першы намеснік міністра энэргетыкі Леанід Шэнец, з турэцкага - міністр энэргетыкі і прыродных рэсурсаў Турэцкай Рэспублікі Берат Албайрак.
Як удакладнілі ў Мінэнэрга, пагадненнем прадугледжваецца развіццё двухбаковага супрацоўніцтва ў сферы фундаментальных і прыкладных даследаванняў і распрацовак у галіне мірнага выкарыстання атамнай энэргіі, у тым ліку, у выбары пляцовак, праектаванні, будаўніцтве, эксплуатацыі, мадэрнізацыі, выпрабаванні і тэхнічным абслугоўванні атамных электрастанцый і даследчых рэактараў. Акрамя таго, пагадненне закранае сферы абыходжання з радыеактыўнымі адходамі, распрацоўкі перадавых і інавацыйных атамных рэактараў і тэхналогій ядзернага паліўнага цыкла і іншыя кірункі.