Работнікаў Нясвіжскага завода медпрэпаратаў абвінавачваюць у крадзяжы 40 тон сыравіны

Завершана расследаванне крымінальнай справы ў дачыненні да службовых асоб Нясвіжскага завода медпрэпаратаў.

Работнікаў абвінавачваюць у крадзяжы больш за 40 тон другаснага поліэтылену, што пацягнула шкоду прадпрыемству на 37 тысяч рублёў (больш за 18 тысяч даляраў). Пра гэта паведамляе прэс-служба Упраўлення Следчага камітэта Менскай вобласці.

Паводле звестак следства, двое службовых асоб і працаўнік завода з траўня 2014 да жніўня 2016 года ўносілі непраўдзівыя звесткі аб колькасці другаснага поліэтылену, які паступае на склад адходаў вытворчасці. Так штучна стваралі складскія лішкі, якія пазней выкрадалі і прадавалі.

З дапамогай аператыўных супрацоўнікаў УБЭП быў выяўлены канал продажу выкрадзенага маёмасці (частку ўжо вярнулі заводу).

— Выяўлена больш за 100 фактаў злачынных дзеянняў, — паведаміла прэс-сакратарка УСК Менскай вобласці Таццяна Беланог.

Фігурантам прад'яўлена абвінавачванне паводле ч. 4 арт. 210 Крымінальнага кодэкса (Крадзеж шляхам злоўжывання службовымі паўнамоцтвамі, учынены групай асоб паводле папярэдняй змовы ў асабліва значнай суме). Санкцыя артыкула — пазбаўленне волі на тэрмін ад 5 да 12 гадоў з канфіскацыяй маёмасці.

З улікам прызнання сваёй віны і поўнай кампенсацыі шкоды абвінавачаныя адпушчаныя пад заклад і асабістую паруку. На ініцыятыву следства з санкцыі пракурора абвінавачаныя адхіленыя ад пасадаў.