Менская ДАІ распавяла пра новыя неспадзяванкі для кіроўцаў

Як будзе рэалізоўвацца план Шорца для «зніжэння нагрузкі» на цэнтр горада.

Учора мэр Менска заявіў пра неабходнасць зніжаць нагрузку на цэнтр горада, а адна з прапаноў - развіваць колцавыя магістралі. Сёння ў Менскай ДАІ распавялі пра мерапрыемствы, якія будуць укаранёныя ў найбліжэйшы час. У першую чаргу пачнуць разгружаць першае кальцо - на ім рэалізуюць прынцып «зялёнай хвалі», хуткасць руху складзе 30-40 км/г. Але ў некаторых вузлах, напрыклад, на Багдановіча - Машэрава, давядзецца ахвяраваць левымі паваротамі, піша onliner.by.

Цяпер фактычна адбываецца краевугольнае змяненне ў прынцыпах руху горада. Раней прыярытэт безумоўна быў аддадзены радыяльным магістралям. Да чаго гэта прывяло, можна назіраць у цэнтры. Усе магчымасці ў прапускной здольнасці вычарпаныя, і ў пікавыя моманты ўтвараюцца заторы.

- Прыярытэт будзе аддадзены колцавым магістралям, - падкрэслілі прадстаўнікі Менскай ДАІ. - Першаму і другому кальцу, напрыклад.

З першых дзён 2017-га менскія кіроўцы ўбачаць змены. Сякія-такія працы ўжо праводзяцца. Напрыклад, на першым кольцы - на пр. Машэрава (ля крамы Preston) будуць устаноўленыя святлафоры. Доўгі час пешаходны пераход быў нерэгулюваным, і існавала высокая рызыка ўчынення ДТЗ з пацярпелымі.

- Скончыць будаўніцтва святлафорнага аб'екта плануецца ў першым квартале 2017-га, - паведамілі ў ДАІ. - Там жа з'явяцца веладарожкі і выдзелены левы паварот.

«Карман» зроблены не проста для зручнасці. Гэта таксама кампенсацыя зменаў на скрыжаванні Машэрава - Багдановіча. Так, там будуць сур'ёзныя карэктывы. Напрыклад, будуць забароненыя адразу два левыя павароты (на вул. Багдановіча), пра што паведамлялася раней. Гэта таксама частка мерапрыемстваў, запланаваных на першым коле, якія і заклікаюць палепшыць там рух.

- Паводле разлікаў экспэртаў, прапускная здольнасць у гэтым вузле вырасце на 30%, - распавялі інспектары. - Пры гэтым рух грамадскага транспарту не зменіцца (праз скрыжаванне праходзяць маршруты аўтобусаў, якія паварочваюць налева).

Яшчэ адна важная карэктыва закране скрыжаванне Машэрава - Пераможцаў. Там прыбяруць стрэлку, якая дазваляе паварот налева (калі ехаць па пр. Пераможцаў з боку вул. Мельнікайтэ). Гэта будзе зроблена таксама для паляпшэння прапускной здольнасці па першым кольцы. Раней дадатковая секцыя святлафора была часова ўсталяваная на перыяд перакрыцця руху вуліцай Цэткін у сувязі з будаўніцтвам метро.

- Гэты левы паварот будзе забаронены ў першыя дні новага года, - удакладнілі інспектары. - На ростанях таксама ўкарэняць датчыкі без правадоў і разумныя відэакамеры, каб атрымліваць інфармацыю аб транспартных плынях у онлайн-рэжыме і гнутка кіраваць трафікам.

Разумныя відэакамеры і датчыкі будуць укараняць і на іншых адцінках першага кольца. Дзякуючы гэтым прыладам удасца аператыўна адсочваць дарожную сітуацыю і рэагаваць на транспартны попыт. Груба кажучы, вечарам надаваць прыярытэт аднаму кірунку, раніцай - іншаму, у выходныя дні ўвядуць спрошчаны рэжым. Будуць таксама ўкаранёныя супрацьзаторныя алгарытмы, напрыклад, у выпадку пагаршэння ўмоў надвор'я і зніжэння хуткасці плыні.

- У выніку нам удасца дамагчыся хуткасці руху 30-40 км/ч на найважнейшым адрэзку пр. Машэрава (ад пр. Незалежнасці да вул. Ціміразева). Важна, што яна будзе сталай, то бок, кіроўцам не давядзецца спыняцца. Такім чынам плануецца рэалізаваць зялёную хвалю, - дапоўнілі інспектары. - Як вынік, на 15% павысіцца прапускная здольнасць, атрымаецца знізіць страты ў дарожным руху на $50-60 тысяч за год.

Гэта першая частка будаўніцтва падсістэмы відэакантролю аўтаматызаванай сістэмы кіравання дарожным рухам у Менску. Яе на замову ГУУС і ў інтарэсах ДАІ выконвае ААТ «Агат - сістэмы кіравання» супольна з Беларускай асацыяцыяй экспэртаў і сюрвеераў на транспарце. Фактычна гаворка ідзе пра ўкараненне ў горадзе інтэлектуальнай транспартнай сістэмы, і адбываецца гэта ў рамках канцэпцыі «Добрая дарога», якая давяла сваю эфектыўнасць. Зразумела, атрыманае адабрэнне ў кіраўніцтва Менгарвыканкама і УДАІ МУС.

- Мерапрыемствы для павышэння прапускной здольнасці з дапамогай сістэм кіравання дарожным рухам у свеце ўважаюцца за найбольш танныя і эфектыўныя. Калі іх магчымасці вычарпаныя, неабходна ўжываць будаўнічыя звхвды, напрыклад, узвядзенне шматузроўневых развязак, - звярнулі ўвагу прадстаўнікі ДАІ. - Эфект на першым коле будзе дасягацца за кошт укаранення новых алгарытмаў кіравання святлафорамі з ужываннем інавацыйных дэтэктараў, а таксама невялікіх рэканструктыўных мерапрыемстваў (узвядзенне астраўкоў бяспекі, вылучэнне левых «кішэняў»), змены знакаў і разметкі.

Другая частка праекта (ён ужо распрацаваны) уключае ў сябе святлафорныя аб'екты на другім кальцы і з улікам бюджэтнага фінансавання стартуе адразу пасля першай. Усяго змене падлягаюць 90 скрыжаванняў горада. Рэалізаваць праект плануецца за два гады.