Вайскоўцаў для аховы БелАЭС навучаюць у Санкт-Пецярбургу
10- 23.12.2016, 15:49
- 20,375
Вайсковая частка для аховы Астравецкай АЭС размесціцца на месцы сталай дыслакацыі ў пачатку студзеня.
Пра гэта паведаміў намеснік міністра ўнутраных спраў - камандуючы ўнутранымі войскамі генерал-маёр Юрый Караеў, паведамляе БелТА.
«Ужо дзесьці ў пачатку студзеня частка будзе размяшчацца ў пункце сталай дыслакацыі», - паведаміў Караеў.
Касцяк часткі ўжо сфармаваны, удакладніў намеснік міністра. Ён таксама паведаміў, што заканчваецца прыёмка аб'ектаў вайсковага гарадка.
Вайскоўцы, якім трэба будзе ахоўваць БелАЭС, праходзяць спецыяльную падрыхтоўку як у Беларусі, так і ў Расеі - паводле дамоўленасці з Нацыянальнай гвардыяй. «Некалькі груп па чарзе вучацца ў Санкт-Пецярбургу. У іх ліку спецыялісты тэхнічных сродкаў аховы, начальнікі каравулаў, вартавыя КПП», - распавёў Караеў.
Раней паведамлялася, што выконваць задачу ў фізічнай абароне Беларускай АЭС будзе вайсковая часць 7434. Ахоўваць АЭС будзе адзін батальён - блізу 300 вайскоўцаў. Планавалася, што з красавіка 2017 года вайскоўцы пачнуць прымаць аб'екты пад ахову, а воінская частка канчаткова сфармуецца да верасня 2017 года.