На БелАЭС пацвердзілі аварыю падчас перавозкі новага корпуса рэактара

Паводле паведамленняў дырэкцыі БелАЭС, інцыдэнт на чыгунцы на самай справе адбыўся.

26 снежня на сайце charter97.org са спасылкай на жыхара Талачынскага раёна з'явілася інфармацыя пра інцыдэнт з новым корпусам рэактара для БелАЭС. Крыніца сцвярджала, што корпус мог атрымаць пашкоджанні падчас перавозкі па жалезнай дарозе, таму што закрануў апору кантактнай сеткі.

Удзень 27 снежня ў дырэкцыі будаўніцтва БелАЭС у гутарцы з euroradio.fm гэтую інфармацыю пацвердзілі часткова. Са слоў супрацоўнікаў прэс-службы дырэкцыі, інцыдэнт на чыгунцы на самай справе адбыўся, аднак дробныя пашкоджанні атрымаў не корпус рэактара, а ахоўны металічны транспартны кажух.

«26 снежня 2016 года падчас выканання манеўровых аперацый на станцыі Слаўнае Беларускай чыгункі ў негабарытным месцы адбыўся нязначны дотык ахоўнага металічнага транспартнага кажуха звышгабарытнага грузу (корпуса рэактара для Беларускай АЭС) аб апору кантактнай сеткі. Пашкоджанняў на корпусе рэактара не выяўлена. Парушэнні графіка руху цягнікоў не было. Груз накіроўваецца далей паводле вызначанага раскладу», ― гаворыцца ў афіцыйным паведамленні Дырэкцыі будаўніцтва БелАЭС.

Папярэдні інцыдэнт з ужо дастаўленым на будаўнічую пляцоўку корпусам рэактара адбыўся ў ліпені ― шматтонная металічная канструкцыя «саслізнула на грунт» з вышыні некалькіх метраў. Пра інцыдэнт афіцыйна не паведамлялася некалькі тыдняў, аднак у выніку, дзякуючы публікацыям у СМІ, «Расатам» прызнаў, што здарэнне адбылося на самай справе, а беларускі бок выказаў жаданне замяніць корпус рэактара на новы.