Развязанне нафтагазавых спрэчак з Расеяй перанеслі на 2017 год
2- 28.12.2016, 16:55
- 14,578
Нявызначанасць энэргетычнага пытання багатая для луканомікі фатальнымі наступствамі налета.
«Развязанне нафтагазавых пытанняў з Расеяй, відавочна, пераносіцца налета», - паведаміў БелТА старшыня канцэрна «Белнафтахім» Ігар Ляшэнка.
Паводле ягоных слоў, бакі прадаўжаюць перамовы, і Беларусь разлічвае на больш хуткае развязанне ўсіх наяўных пытанняў.
Нагадаем, афіцыйны Менск уважае за справядлівы кошт расейскага газу $73 за 1 тысячу кубаметраў.
Беларускія ўлады кажуць: праз высокі кошт газу беларускія тавары становяцца неканкурэнтаздольнымі на расейскім рынку, што супярэчыць прынцыпам і «саюзнай дзяржавы», і ЕАЭС.
Расея з гэтым не згаджаецца, спасылаючыся на дзейны кантракт, у якім зафіксаваны кошт $132 за 1 тысячу кубаметраў.
Паколькі Беларусь сёлета плаціць новым коштам, то ў выніку завінавачаная Расеі за газ $340 млн.
У сувязі з гэтым Расея скараціла пастаўкі нафты ў Беларусь на перапрацоўку ў трэцім квартале з 5,3 млн да 3,5 мільёна тон. У чацвёртым квартале пастаўкі планавалася дадаткова зрэзаць яшчэ на 500 тысяч тон.
Паводле падлікаў беларускага боку, недапастаўкі нафты могуць сур'ёзна адбіцца на росце ВУП. Замест запланаванага росту на 0,3% за 2016 год эканоміка краіны можа сысці ў мінус на 2%.
Нагадаем, 28 снежня прадстаўнік Федэральнай антыманапольнай службы Расеі заявіў, што тарыф транспартавання нафты з Расеі для беларускай «Гомельтранснафты Дружба» будзе павышаны на 7,7% у 2017 годзе замест раней запытаных 20,5% і прапанаваных «Транснафтай» 5,8%.
Аднак ужо праз некалькі гадзін старшыня канцэрна «Белнафтахім» Ігар Ляшэнка зняпраўдзіў наяўнасць дамоўленасці з РФ.