На корпусе рэактара БелАЭС застаўся прыкметны след ад удару аб слуп

Наступствы аварыі пры транспартаванні новага корпуса для Астравецкай АЭС утаіць не ўдалося.

На афіцыйным сайце БелАЭС з'явілася фота корпуса рэактара, які прыбыў на будаўнічую пляцоўку. На ахоўным кажуху, у які загорнутая дэталь, добра бачны брудны след, паведамляе euroradio.fm.

26 снежня з цягніком, які перавозіў корпус рэактара для БелАЭС, здарыўся інцыдэнт. Дырэкцыя БелАЭС заявіла, што на станцыі «Слаўнае» адбыўся «судотык металічнага транспартнага кажуха, які ахоўвае апорны корпус рэактара, з полай жалезабетоннай апорай кантактнай сеткі». Калі казаць прасцей, дэталь АЭС сутыкнулася са слупам.

Гэтага следу не відаць на ранейшых здымках, бо дагэтуль цягнік з корпусам рэактара фатаграфавалі толькі з іншага боку:

У дырэкцыі БелАЭС адмовіліся пракаментаваць, засталася гэтая пляма пасля здарэння або з'явілася нейкім іншым чынам. Там адзначаюць, што хуткасць руху цягніка ў момант дотыку да апоры была блізу 3 км/г.

Корпус рэактара ўжо агледзелі прадстаўнікі генеральнага канструктара, завода-вытворцы, Беларускай чыгункі, кампаніі перавозчыка, страхавой кампаніі, заказчыка і генпадрадчыка. «Ніякіх пашкоджанняў не выяўлена, - паведамляюць у дырэкцыі станцыі. - У адпаведнасці з рэгламентам кантроль корпуса рэактара, як і ўсякага іншага абсталявання, што паступае на АЭС, будзе ажыццяўляцца ў штатным рэжыме з удзелам спецыялістаў адпаведных арганізацый».