Беларусы выпусцілі арыгінальны дадатак для аматараў сэлфі
- 8.12.2016, 12:14
- 16,551
Дзякуючы створанаму менчукамі сэрвісу Fabby фатаграфіі даслоўна ажываюць.
Менская каманда Aimatter прэзентавала дадатак Fabby, які дадае анімаваны фон на сэлфі-фатаграфіі. Мабільны дадатак даступны для загрузкі ў App Store, піша tut.by.
Сэрвіс працуе так: вы робіце сэлфі, а дадатак «атачае» вас фонам. Варыянты ёсць розныя — камін, паўночнае ззянне, салюты, сняжынкі і нават каты, што сыплюцца з неба. Частка фону анімаваная, з імі звычайная фатаграфія ператвараецца ў пацешнае відэа.
Дадатак стаў даступны 14 кастрычніка ў Індыі і Аўстраліі, а 7 снежня прайшоў сусветны рэліз для некалькіх дзясяткаў краін. Са слоў распрацоўшчыкаў, у будучыні дадатак з'явіцца і на Android, праўда, дакладныя тэрміны запуску пакуль невядомыя.
Стварэннем новага сэрвісу кіруе беларус Юрый Мельнічак, вядомы паводле праекта MAPS.ME, у 2014 годзе прададзенага Mail.Ru Group. Адзін з заснавальнікаў Fabby — Юрый Гурскі, які раней удзельнічаў у такіх праектах як Prisma і MSQRD.