Незалежны прафзвяз адваяваў для рабочага 53 мільёны страхавых выплат

Гамяльчук Аляксандр Клімаў пасля траўмы на заводзе чатыры гады дамагаўся ад дзяржавы страхавых выплат.

Юрыдычная служба прафзвязу работнікаў радыёэлектроннай прамысловасці (РЭП) атрымала чарговую перамогу. Гомельскі рабочы, сябра прафзвязу РЭП, Аляксандр Клімаў у дадатак да раней выплачаных яму 68 мільёнаў і штомесячнай даплаты да пенсіі атрымае яшчэ 53 мільёны рублёў, паведамляе сайт praca-by.info.

Суд Савецкага раёна Гомеля задаволіў позву Аляксандра Клімава аб кампенсацыі 53 мільёнаў рублёў, недаатрыманых праз несвоечасовае афармленне Акту формы Н1 у сувязі з атрыманнем вытворчай траўмы.

Пра гэта паведаміў прававы інспектар прафзвязу РЭП Леанід Судаленка.

Як пісаў раней сайт charter97.org некалькі гадоў таму работнік Гомельскага хімзавода Аляксандр Клімаў, знаходзячыся на працоўным месцы, праз пары вадкай серы страціў прытомнасць і ўпаў з вышыні. Аднак кіраўніцтва прадпрыемства ўжывае ўсе захады, каб скласці акт аб невытворчым характары сур'ёзнай траўмы, якую атрымаў рабочы ў выніку падзення. Чатыры гады спатрэбілася Аляксандру Клімаву, каб дамагчыся справядлівасці.

У выніку велізарнай працы, праведзенай прававым інспектарам Леанідам Судаленкам, працоўны адсудзіў пакладзеныя яму выплаты за тры гады і пачаў атрымліваць штомесячную даплату да пенсіі ў сувязі з атрыманнем вытворчай траўмы. Але яшчэ адзін год заставаўся няўлічаным, а працадаўца, спасылаючыся на тэрмін даўніны, адмаўляўся выконваць свае абавязанні.

Аляксандр Клімаў пры падтрымцы прафзвязу РЭП наважыў ісці да канца і запатрабаваў выплаты недаатрыманых сум за чацвёрты год.

10 сакавіка 2016 года суддзя суда Савецкага раёна Гомеля Анжэла Касцюкевіч задаволіла позву рабочага.

- Акт аформілі праз чатыры гады пасля няшчаснага выпадку. За апошнія тры гады Белдзяржстрах усе сумы яму выплаціў. Год застаўся неаплачаны. Вось за гэты перыяд мы і спагналі 53 мільёны. Гэта дадаткова да тых 66 мільёнаў, якія Клімаў атрымаў восенню. Я мяркую, што наш прафзвяз атрымаў яшчэ адну перамогу ў справе абароны інтарэсаў работнікаў працы, - пракаментаваў прававы інспектар прафзвязу РЭП Леанід Судаленка.