На месцы Лютэранскіх могілак у Менску спынілі работы
11- 13.05.2016, 21:37
- 33,369
Будаўнічыя арганізацыі прыпынілі работы для расшырэння вуліцы Карла Лібкнэхта пасля публікацый у СМІ аб знойдзеных пахаваннях.
Сёння ў Сеціве з'явіліся фатаграфіі парэштак, знойдзеных на месцы работ для расшырэння адцінка вуліцы Карла Лібкнэхта каля Лютэранскага сквера - былога нямецкага могільніка.
Намеснік кіраўніка Адміністрацыі Маскоўскага раёна Уладзімір Танкевіч даведаўся аб знойдзеных пахаваннях ад журналістаў і затэлефанаваў адказным за будоўлю.
Дырэктар арганізацыі КУП «Гардарбуд» Міхаіл Глушакоў паведаміў, што работы на месцы знойдзеных пахаванняў спыненыя, пададзена заяўка ў РУУС Маскоўскага раёна, на месца выехаў патруль міліцыі. Начальнік генеральнага выканаўцы КУП «УДМСіБ» Генадзь Мяцеліца пацвердзіў інфармацыю аб знаходцы і таксама выехаў на месца, паведамляе tut.by.
Цяпер работы на месцы знойдзеных пахаванняў сапраўды не вядуцца. Каля адной з ямін ляжыць выкапаная надмагільная пліта з надпісам лацінскімі літарамі. Працоўныя адпачываюць, тэхніка спыненая.
- Косці адразу былі відаць, ужо іх шмат вывезлі адсюль, наколькі чуў ад працоўных - на сметнік, - сказаў журналістам мясцовы жыхар, які прадставіўся Сяргеем. Паводле ягоных слоў, работы тут актыўна вядуцца ўжо некалькі дзён.
- Управай Следчага камітэта праводзіць праверку факту выяўлення касцяных парэштак на месцы правядзення будаўнічых работ, - паведаміла афіцыйная прадстаўніца Следчага камітэта Юлія Ганчарова.
Паводле ейных слоў, пры паступленні інфармацыі ад будаўнічай арганізацыі на месца выязджаюць следчыя, праводзяць агляд месца здарэння, вымаюць выяўленыя парэшткі.
Паводле інфармацыі следчых, лютэранскія могілкі, якія размяшчалася на гэтым месцы, зруйнавалі ў 80-х гадах мінулага стагоддзя.
- Могілкі ўлічаныя, інфармацыя пра тое, што там было месца пахавання, ёсць.
Следчы камітэт прызначыў медычна-крыміналістычную экспэртызу парэшткаў. Правядзенне экспэртызы даручаецца Дзяржкамітэту судовых экспэртыз.
Актывіст МГА «Гісторыка» Павел Іваніцкі дзяжурыць на месцы будаўнічых работ увесь дзень.
- З аднаго боку добра, што работы спынілі, але ж гэта зрабілі праз некалькі дзён. Рабочыя ж бачылі, што выкопваюць парэшткі, але не спыняліся, кіраўніцтва загадала.
Ён мяркуе, што замоўца парушыў артыкул № 23 Закона «Аб пахаваннi i пахавальнай справе», артыкул 347 Крымінальнага кодэкса «Здзек з трупа або магілы».