Аператары назвалі дэнамінаваныя кошты на сувязь

Кошт за паслугі аператараў сувязі не толькі «адкінуў» нулі, але і павысіўся.

1 ліпеня беларусаў чакае дэнамінацыя: усе кошты адкінуць чатыры нулі, а ў кашальках з'явяцца новыя грошы. Аператары сувязі ўжо падрыхтавалі новыя кошты з капейкамі.

Расцэнкі на гарадскую сувязь апублікаваныя ў пастанове Міністэрства эканомікі, якія ўваходзяць у дзеянне з 1 ліпеня 2016 г. Усё кошты стануць меншымі роўна ў 10 000 разоў, піша tut.by.

Мабільныя аператары таксама падрыхтаваліся да дэнамінацыі - на іх сайтах ужо цяпер можна бачыць кошты ў капейках. Праўда, у некаторых сумы не толькі адкінулі нулі, але таксама трохі павысіліся.

МТС «акругліў» кошты на сувязь «напярэдадні дэнамінацыі для зручнасці разлікаў» яшчэ 21 траўня. Большая частка коштаў стала кратная адной капейцы (100 рублям у старых коштах). Некаторыя паслугі для абанентаў аператара сталі таннейшыя, а некаторыя падаражэлі. Цяпер на сайце аператара пазначаныя толькі дэнамінаваныя кошты.

velcom таксама падрыхтаваўся да новых грошай. На сайце аператара з'явіўся «пераключальнік» паміж старымі і новымі коштамі. Самі сумы сталі большымі з 16 траўня: рост сярэдняга абаненцкага рахунку на тарыфных планах склаў блізу 2,5%.

life :) на сваім сайце пачаў паказваць кошты двума калонкамі - да дэнамінацыі і пасля. Кошт паслуг памяняўся з 6 чэрвеня: большая частка падаражэла, асобныя паслугі сталі даражэйшыя на 16,6%.

«Белтэлекам» таксама цяпер паказвае і кошты да дэнамінацыі, і кошты пасля яе. Лічбы адрозніваюцца толькі колькасцю нулёў, самі тарыфы не памяняліся.