20 чэрвеня 2019, Чацвер, 5:20
Мы ў адной лодцы
Рубрыкі

У лунінецкай новабудоўлі ліфт ляціць на дах

27

Ліфт на шалёнай хуткасці паляцеў угору, рэзнуўся ў перакрыцце на тэхнічным паверсе і захрас.

- Спачатку быў скрыгат, а потым моцны ўдар, - так апісваюць здарэнне жыхары дома на вуліцы Гагарына 200А.

Дзевяціпавярховіку яшчэ няма і двух гадоў, дом здалі ў эксплуатацыю ў канцы верасня 2014 года. За гэты час звычайная паездка ў ліфце ўжо два разы магла абярнуцца трагедыяй для тых, хто жыве ў новабудоўлі, піша «Медыя-Палессе».

- Ліфт на шалёнай хуткасці паляцеў угору і рэзнуўся ў перакрыцце на тэхнічным паверсе, там і захрас, - расказваюць жыхары шматпавярховіка. - А калі б унутры апынуліся людзі?

Напалоханыя здарэннем жыхары расказваюць, што неадэкватна ліфт павёў сябе другі раз.

Першы выпадак здарыўся ў красавіку.

Да гэтага, з моманту здачы дома ў эксплуатацыю, новы ліфт вырабу «Магілёўліфтмаша» ламаўся часта. Жыхарам, а гэта сем'і з двума-трыма дзецьмі, даводзілася падымацца сходамі. Потым ліфт трохі падладзілі, на некаторы час паломы сталі здарацца радзей. Пакуль у адзін з дзён жыхарка 9 паверху не націснула на клавіш выкліку ліфта.

Замест таго, каб пад'ехаць і спыніцца на патрэбным паверсе, машына набрала шалёную хуткасць і рэзнулася ў перакрыцце на тэхнічным паверсе, там жа і засеўшы.

Жыхары распавядаюць, што з шчаслівай выпадковасці тады ў кабіне нікога не было.

Пасля гэтага ў шматпавярховіку пабывалі кіраўнікі адпаведных службаў: ад мясцовых да абласных. Блізу трох тыдняў ліфт рапаравалі. Як выявілася, высветліць тады прычыну такіх паводзін ліфта не здолелі, машыну зноў запусцілі ў эксплуатацыю.

Пакарабачаны, з драпінамі пасля аварыі і няшчыльна зачыненымі дзвярыма, ліфт доўга не прапрацаваў. Ужо даслоўна на наступную раніцу ў ім захрасла жанчына з 7-гадовым дзіцём. Дзяўчынка перапалохалася настолькі, што пасля гэтага ўважае за лепшае хадзіць пешшу па сходцах.

- Была раніца, мы спазняліся ў школу, ліфт захрас паміж першым і другім паверхам, - распавядае жыхарка. - З мабільніка я затэлефанавала на пазначаны ў кабіне нумар аварыйнай службы. На іншым канцы параілі паспрабаваць адчыніць дзверы самастойна. Але дзверы не рассоўваліся. Тады ў аварыйнай службе выдалі: чакайце, зараз адправім каго на роварах... Кіраўнікі раз'язджаюць па горадзе на службовых аўто, а простыя працавікі круцяць панажы, каб вызваліць захраслых у ліфце людзей... Папяўшыся, дзверы ўсё ж здолелі рассунуць, не чакаючы «выратавальнікаў» на роварах.

Спачатку людзі баяліся заходзіць у ліфт. Ад'ездзіўшы крыху больш за два месяцы, ліфт зноў «паляцеў на дах».

- Я выйшла на пляцоўку, гляджу - клавіш не запальваецца. Акурат прыйшоў з працы на абед муж. Кажа, што ліфт зноў «паляцеў», - распавядае другая жыхарка новабудоўлі. Жанчыну даслоўна перасмыкнула, калі тая згадала, што ў гэты час акурат мусіла вярнуцца і дачка, бо невядома было, ці знаходзіўся хто ў гэты момант у ліфце. Затэлефанаваўшы дзіцяці на мабільны нумар, жанчына трохі супакоілася.

- Пасля першага разу ліфт быў падрапаны, хісталася ўсё, а што будзе зараз - страшна нават уявіць. Мы плацім крэдыты, за ўкладзеныя грошы хацелася б карыстацца нармальным ліфтам, - кажа яшчэ адна жыхарка.

Даслоўна на наступны дзень пасля здарэння ў Лунінцы пабываў начальнік Пінскага сэктара «Брэстліфта» Валер Вашчылка, які распавёў жыхарам, што з 800 такіх жа ліфтаў, што знаходзяцца на абслугоўванні, гэта - першы выпадак. Але людзі напалоханыя і хочуць быць упэўненыя, што па ўваходзе ў ліфт з імі або іхнімі дзецьмі нічога не здарыцца.

Раз Валер Вашчылка сышоў у адпачынак, выпала звязацца з в.а. начальніка сэктара Віктарам Грэчкам, які адзначыў, што бяспека жыхароў - на першым месцы. Работнікі ўжо пачалі выраўноўваць кабіну, знялі плату кіравання і будуць адпраўляць яе на «Магілёўліфтмаш».

- Сам ліфт не пацярпеў моцна, толькі верх, пастараемся зрабіць усё прыгожа, спадзяюся, ніякіх прэтэнзій не будзе ў жыхароў, - дадаў Віктар Грэчка.

- Не можам зразумець прычыну, чакаем высноў камісіі, - адзначыў прадстаўнік ліфтавай службы.

Калі пачне дзейнічаць ліфт - пакуль таксама не вядома, але запускаць яго, не пераканаўшыся, што трэцяга «палёту» дакладна не будзе, не стануць. Пакуль жа жыхары новабудоўлі далей ходзяць пехатой.