Пайшоў з жыцця кампазітар Алесь Рашчынскі
8- 10.08.2016, 16:03
- 13,112
Кампазітар усе свае сілы аддаваў на выкладанне, выдавецтва зборнікаў беларускіх песень і папулярызацыю роднай беларускай мовы.
10 жніўня раніцай у выніку цяжкай хваробы памёр вядомы беларускі кампазітар, збіральнік фальклору, выдатны настаўнік і шчыры сумленны чалавек Алесь Рашчынскі, піша «Беларускі партызан».
Алесь Рашчынскі нарадзіўся ў Лагойску ў 1949 годзе. Скончыў універсітэт імя Гнесіных у Маскве, а пасля - Беларускую Акадэмію музыкі ў класе знакамітага кампазітара Яўгена Глебава.
У 1973 годзе супольна з Я.Б. заснаваў аддзяленне Народна-харавыя спевы ў Менскім музычным каледжы імя М.І.Глінкі. Доўгі час працаваў з музычнымі калектывамі «Харошкі» і «Купалінка».
З 1985 года з'яўляўся сябрам Саюза кампазітараў Беларусі.
На жаль, краіна, патрыётам якой з'яўляўся Алесь Рашчынскі, не цаніла яго. Многія з ягоных твораў і цяпер застаюцца невядомымі. Але кампазітар не прагнуў славы, а ўсе свае сілы аддаваў на выкладанне дырыжыравання, напісанне харавых партытур, апрацоўку беларускіх народных песень і напісанне артыкулаў на роднай мове.
Як і ягоны сябар беларускі пісьменнік Ніл Гілевіч, Рашчынскі выдаваў зборнікі беларускіх песень за ўласныя грошы і актыўна прапагандаваў родную беларускую мову.
Развітанне з Алесем Рашчынскім пройдзе 11 жніўня па адрасе Альшэўскага, 12.