Улады павялічаць штрафы за самавольную перапланіроўку

Чыноўнікі ад будаўніцтва прыдумалі, як збіраць з людзей больш штрафаў.

У Беларусі плануецца ўзмацніць адказнасць за самавольнае будаўніцтва, над гэтым зараз працуе спецыяльна створаная міжведамасная група. Пра гэта паведамілі прадстаўнікі галоўнага ўпраўлення кантролю Менска Камітэта дзяржаўнага кантролю падчас прамой лініі ў Заводскім раёне, паведамляе onliner.by.

- Самавольнае будаўніцтва ў сталіцы - адно з найбольш вострых пытанняў, - адзначыў начальнік галоўнага ўпраўлення кантролю Менска КДК Сяргей Край. - Яшчэ год таму галоўнае ўпраўленне кантролю Менска пачало займацца так званымі блочнымі дамамі: калі на базе аднаго невялікага будынка фактычна ўзводзіцца шматкватэрнае жыллё ў рэжыме рэканструкцыі. Пасля гэтага мы праверылі не толькі сядзібную забудову, але і ўчасткі, дзе ўзводзіліся аб'екты іншага прызначэння. І выявілі мноства выпадкаў самавольнага будаўніцтва: дамы нарошчваюць ў разы - як у вышыню, так і па плошчы.

Варта адзначыць, што да самавольнага будаўніцтва належыць і рэканструкцыя, і перапланіроўка кватэры без адпаведнага дазволу.

- Згодна з прадстаўленай Менгарвыканкамам паводле нашага запыту інфармацыі, за 5 месяцаў гэтага года адміністрацыямі раёнаў горада выяўлена 424 факты самавольнага будаўніцтва, - паведаміла намесніца начальніка галоўнага ўпраўлення кантролю ў Менску КДК Вера Мацулевіч. - З іх 326 учыненыя фізічнымі асобамі, 98 - юрыдычнымі. Для параўнання: за 2015-ы выяўлена 845 фактаў самавольнага будаўніцтва: 674 і 171 адпаведна.

У спісе грахоў значацца адсутнасць дазволу Дзяржбуднагляду, істотныя адступленні ад праекту, парушэнні горадабудаўнічых нормаў альбо рэгламенту Генплана. Са слоў Веры Мацулевіч, эканамічны рычаг уздзеяння на такіх парушальнікаў мае патрэбу ва ўзмацненні жорсткасці.

- Паводле Кодэкса Рэспублікі Беларусь аб адміністрацыйных правапарушэннях, максімальны штраф за самавольнае будаўніцтва для фізічнай асобы складае ад 20 да 50 базавых велічынь, для юрыдычнай - ад 20 да 500, - тлумачыць яна. - Але суды з тых фактаў, якія мы бачылі, як правіла, прысуджаюць невысокі памер адміністрацыйнага штрафу для юрыдычных асоб - 20-50 базавых, што зусім непамерна выгадзе, якую атрымаў або атрымлівае забудоўшчык або заказчык аб'екта. Да прыкладу, ён узвёў самавольна 600 кв. м, а сума штрафу эквівалентная кошту аднаго квадрата. Паводле распараджэння прэм'ер-міністра Рэспублікі Беларусь, сёння што да самавольнага будаўніцтва створаная спецыяльная міжведамасная рабочая група, якая працуе над узмацненнем жорсткасці мер адказнасці.