Кабякоў здзіўлены, што ў Беларусь не ідуць інвестары

Прэм'ер-міністр мяркуе, што інвестары проста не ведаюць, які «выдатны» інвестклімат у краіне стварылі ўлады.

Беларусь гатова пераймаць найлепшыя сусветныя інвестыцыйныя практыкі і гарантаваць іх выкананне, заявіў сёння прэм'ер-міністр Беларусі Андрэй Кабякоў на адкрыцці форуму «Пашыраючы гарызонты: інвестыцыі, фінансы, развіццё», паведамляе БелТА.

«Беларусь гатовая пераймаць найлепшыя сусветныя практыкі і гарантаваць іх якаснае выкананне», - адзначыў Андрэй Кабякоў.

Кіраўнік урада прызнаў, што, нягледзячы на ўсе намаганні, Беларусь пакуль не атрымала той прыток замежных інвестыцый, на які разлічвала.

«Не апошнюю ролю тут адыгрывае недастатковая інфармаванасць інвестараў аб існуючых у Беларусі патэнцыйных магчымасцях. Мы мэтанакіравана працуем над пераадоленнем гэтых недахопаў. Мы арганізавалі шэраг буйных мерапрыемстваў у Нью-Ёрку, Лондане, Вене. Сённяшні форум працягвае пералік гэтых мерапрыемстваў», - растлумачыў Андрэй Кабякоў.