У Гомелі знайшлі загадкавыя падземныя памяшканні
1- 30.09.2016, 10:38
- 12,645
Два падземныя памяшканні нечакана адкапаў экскаватар падчас пракладкі кабельных труб у старой частцы Гомеля.
Знаходкі зробленыя ўчора ля падножжа высокага схілу, які спускаецца да Сожы недалёка ад будынка епархіяльнай управы. Краязнаўцы пакуль могуць толькі здагадвацца аб прызначэнні пакояў. У той жа дзень іх закапалі.
Тэрыторыя, дзе знойдзеныя пакоі, належыць комплексу палаца Румянцавых і Паскевічаў. Памяшканні даследавалі супрацоўнікі аддзела археалогіі і аховы гісторыка-культурнай спадчыны музея Гомельскага палацава-паркавага ансамбля Дзмітрый Ліндзянкоў і Юры Панкоў.
- Відавочна, адзін з пакояў належыць да 60-70 гадоў мінулага стагоддзя, - распавёў Юры Панкоў Onliner.by. - Затое другі старэйшы, магчыма - дарэвалюцыйны.
У старым памяшканні гісторыкі адшукалі аскепкі бутэлькі з надпісамі лацінкай. Таксама на месцы раскопак знайшлі шкляны піўны куфаль - старажылы кажуць, што ў савецкі час тут акурат была піўная (цяпер на яе месцы клумба).
Краязнаўца Яўген Малікаў нагадаў, што да рэвалюцыі тут знаходзілася прыстань - магчыма, да яе маюць дачыненне знойдзеныя рэшткі склепа.
У той жа дзень памяшканні былі закапаны.
Гэтая частка Гомеля багатая артэфактамі. Раней недалёка ўжо была рэканструяваная старадаўняя брукаванка - цяпер на яе месцы зручны спуск, пакрыты сучаснай пліткай. Не атрымалася захаваць і старажытную манаскую келлю, якая знаходзілася на схіле яшчэ ў 90-я.