Чыноўнікі прызналі: у Беларусі высокая палітычная рызыка для замежных інвестараў

Інвестарам дастаткова пачытаць загалоўкі навін з Беларусі, каб зрабіць свае высновы.

Для прыходу прамых замежных інвестыцый на беларускія прадпрыемствы ўзровень іх рэнтабельнасці павінен аплачваць палітычныя рызыкі інвеставання ў эканоміку краіны. Такое меркаванне выказала дырэктарка Нацыянальнага агенцтва інвестыцый і прыватызацыі (НАІП) Наталля Нікандрава 9 студзеня ў Менску на пасяджэнні круглага стала «Прадпрыемствы нясуць страты: крызіс або нежаданне змяніць сітуацыю?», паведамляюць naviny.by.

«Калі мы гаворым пра прыцягненне прамых інвестыцый на прадпрыемства, то, вядома, ніхто не пойдзе на стратнае прадпрыемства, калі гэта не кампанія, якая займаецца скупкай непатрэбных актываў. Таму для таго, каб прапанаваць штосьці і зацікавіць нейкага інвестара, неабходны пэўны ўзровень рэнтабельнасці», — адзначыла кіраўнік НАІП.

Пры гэтым, са слоў Нікандравай, прывабнай для інвестара можа стаць рэнтабельнасць, якая аплачвае не толькі дзейныя стаўкі крэдытаў, але і так званыя краінавыя рызыкі.

«Інвестары не спяшаюцца. У нас, чамусьці, уважаецца, высокая палітычная рызыка. Што такое палітычная рызыка? Гэта рызыка загалоўкаў — калі за мяжой аналізуюць нашу прэсу і бачаць гучныя загалоўкі, дзе якога інвестара пакрыўдзілі. Адпаведна, ніхто не разбіраецца, што адбываецца, каго там на самай справе пакрыўдзілі, і робяць высновы», — сказала яна

«Толькі калі прадпрыемства будзе дастаткова прыбытковым, дастаткова рэнтабельным, толькі ў такім выпадку можна дамовіцца аб выкарыстанні розных фінансавых інструментаў для прыцягнення інвестараў. Гэта можа быць дадатковая эмісія акцый і гэтак далей», — адзначыла Нікандрава.