Spotify прапанаваў Абаму працу ў кампаніі
3- 10.01.2017, 21:14
- 16,662
Сэрвіс струменнага прайгравання музыкі прапанаваў Бараку Абаму працу, пасля таго як 20 студзеня ён пакіне пасаду прэзідэнта ЗША.
На сайце Spotify з'явілася новая вакансія President of Playlists. У аб'яве сказана, што прэтэндэнт павінен будзе адсочваць складанне плэй-лістоў, кантралюючы працу офісаў сэрвісу ў больш як 60 краінах. Кампанія "заўсёды адкрытая для перамен", гаворыцца ў сказе аб працаўладкаванні, паведамляе ВВС.
Сярод задач, якія павінен будзе выконваць "прэзідэнт плэй-лістоў", значыцца забеспячэнне сусветнага лідарства, пошук новых ідэй. У якасці варыянту - уключэнне ў плэйліст звароту да нацыі ў сувязі з заканадаўствам аб ахове здароўя, "што носіць вашае імя".
У якасці патрабавання да кандыдата вылучаецца "прынамсі васьмігадовы досвед кіравання паважанай нацыяй" і наяўнасць Нобэлеўскай прэміі міру.
Наўпрост імя Абамы ў аб'яве не называецца. Рэформа аховы здароўя, якая прайшла ў час ягонага прэзідэнцтва, неафіцыйна называецца "Obamacare". Акрамя таго, каб пераканацца, што адрасат убачыў прапанову, сузаснавальнік і выканаўчы дырэктар Spotify Даніэль Эк напісаў твіт Абаму.
Дзейны прэзідэнт ЗША на яго пакуль не адказаў, піша Associated press.
Абама, працуючы прэзідэнтам, публікаваў свой летні плэйліст на Spotify. У 2016 годзе ў ім былі кампазіцыі Сімон, Стынга, Беёсэ, Боба Марлі і Джэй-Зі.