ФБР: Рэспубліканцы таксама зазналі кібератакі з Расеі

Выведка ЗША ўважае, што хакеры ўзламалі і некаторыя рэспубліканскія серверы, але атрыманыя звесткі не выклалі.

Некаторыя рэсурсы Рэспубліканскай партыі ЗША зазналі кібератакі з боку расейскіх хакераў, заявіў кіраўнік Федэральнага бюро расследаванняў Джэймс Комі на слуханнях у сенаце, паведамляе расейская служба BBC.

Са слоў Комі, гаворка ідзе пра напады на старыя неактыўныя серверы, прыкмет узлому сервераў, звязаных з кампаніяй абранага прэзідэнта ЗША Дональда Трампа або дзейных сервераў Нацыянальнага камітэта Рэспубліканскай партыі, не зафіксавана.

Комі таксама паведаміў, што ў хакераў была магчымасць выбарча выкласці ў адкрыты доступ інфармацыю, здабытую падчас кібератакі на серверы рэспубліканцаў, аднак яны гэтага не зрабілі.

Дырэктар нацыянальнай выведкі ЗША Джэймс Клепер дапоўніў, што з высокай імавернасцю расейскія хакеры з дапамогай нападаў спрабавалі выставіць у негатыўным святле кандыдата ад Дэмакратычнай партыі Хілары Клінтан. Са слоў Клепера, Расея спрабавала паўплываць на зыход выбараў у многіх краінах свету.

Падчас выбарчай кампаніі 2016 года былі ўзламаныя серверы нацыянальнага камітэта Дэмакратычнай партыі. Амерыканскія спецслужбы пазней заявілі, што за нападамі стаяць расейскія хакеры. Адміністрацыя дзейнага прэзідэнта Барака Абамы заявіла, што ў арганізацыі нападаў мог непасрэдна ўдзельнічаць расейскі прэзідэнт Уладзімір Пуцін.

Гэтыя абвінавачванні сталі прычынай выдварэння з ЗША расейскіх дыпламатаў, а таксама ўвядзенне новых санкцый супраць Расеі. Расея ўсе абвінавачванні адпрэчыла, а на высылку дыпламатаў наважыла не адказваць.

На пачатку студзеня амерыканская выведка пасля сустрэчы яе кіраўнікоў з Трампам апублікавала даклад пра расейскіх хакераў. Згодна з дакладам, Пуцін нібыта даў каманду арганізаваць кампанію з мэтай паўплываць на вынікі прэзідэнцкіх выбараў у ЗША і дыскрэдытаваць кандыдата ад Дэмакратычнай партыі Хілары Клінтан.