Экс-начальнік АБЭЗ у Мар'інай горцы дапамагаў бандытам «выбіваць пазыкі» з бізнэсоўцаў

У Пухавіцкім раёне судзяць банду вымагальнікаў і звязанага з ёй былога начальніка АБЭЗ.

У судзе Пухавіцкага раёна пачаўся працэс у справе так званай «банды вымагальнікаў». На лаве падсудных - чатыры чалавекі, у тым ліку былы начальнік аддзела барацьбы з эканамічнымі злачынствамі. Паводле версіі следства, зламыснікі сілай выбівалі запазычанасці з мясцовых прадпрымальнікаў. Вывозілі ў лес, збівалі і прымушалі капаць магілы.

Абвінавачанымі ў справе праходзяць 39-гадовы Дзмітрый Саніковіч, 33-гадовы Артур Зіновіч, 30-гадовы Андрэй Мазанік і 43-гадовы Яўген Козыр. Апошні да распачынання крымінальнай справы ўзначальваў мясцовы АБЭЗ. У адрозненне ад іншых фігурантаў, ён адзіны на гэты момант не ўтрымліваецца пад вартай, у следчым ізалятары знаходзіўся паўгода, паведамляюць naviny.by.

Як адзначана ў абвінавачванні, Саніковіч дамовіўся з дырэктарам мясцовай будаўнічай фірмы аб рэарганізацыі кампаніі, а таксама аб тым, што атрымае долю, сумай 40%. Пазней ён наважыў адмовіцца ад удзелу ў бізнэсе і запатрабаваў ад партнёра вярнуць яму 12 тысяч даляраў, якія ён уклаў у развіццё прадпрыемства, і яшчэ 10 тысяч даляраў у якасці заробку. Паколькі напарнік добраахвотна грошы не вяртаў, Саніковіч дамовіўся з раней судзімымі Зіновічам і Мазанікам, каб тыя дапамаглі яму выбіць пазыку. Пацярпелага неаднаразова збівалі, таксама вывозілі ў лес, дзе прымушалі капаць для сябе магілу. Акрамя таго, Дзмітрый Саніковіч дамовіўся з Яўгенам Козырам аб тым, каб былога партнёра ў бізнэсе даставілі ў РАУС, дзе на яго націснуць з мэтай выбіць пазыку. У выніку начальнік АБЭЗ незаконна правёў даследчую праверку. А да гэтага ў пацярпелага забралі электронны подпіс, пасля чаго ён страціў доступ да асабовых рахункаў кампаніі.

Пра асобу Козыра вядома, што ў міліцыі ён служыў з 1998 года, начальнікам АБЭЗ прызначаны ў 2012. Меў званне старшага лейтэнанта. У судзе заявіў, што на гэты момант нідзе не працуе. З Саніковічам яго звязвалі сяброўскія стасункі. Яўгена Козыра абвінавачваюць ва злоўжыванні і перавышэнні службовых паўнамоцтваў.

Дзмітрыя Саніковіча - у вымагальніцтве, махлярстве, шэрагу службовых злачынстваў, а таксама ў падбухторванні да дачы хабару. Паводле матэрыялаў крымінальнай справы, ён угаварыў аднаго з мясцовых бізнэсоўцаў даць 2 тысячы даляраў супрацоўнікам «Дзяржстандарту». Ад іншага бізнэсоўца ён патрабаваў 1 тысячу даляраў за тое, што нібыта паспрыяў выгаднаму ўкладанню дамовы на правядзенне будаўнічых работ.

У Галоўнай управе ў барацьбе з арганізаванай злачыннасцю і карупцыяй адзначалі, што да затрымання фігурантаў крымінальнай справы пацярпелыя адмаўляліся пісаць заяву і даваць супраць іх паказанні, асцерагаючыся за сваё жыццё і здароўе.

Усе чацвёра абвінавачаных віну не прызналі. «Катэгарычна не згодны з абвінавачваннем, - заявіў Козыр. - Матэрыялы справы сфальсіфікаваныя супрацоўнікамі ГУБАЗ і УСК. Таксама на мяне зрабілі паклёп. Я дзейнічаў у рамках закона».

Ключавы фігурант Саніковіч у судзе адзначыў: «Віну не прызнаю. Гэта ўсё паклёпы і няпраўда».